Josef Motzfeldtip siulittaasutut ingerlaannarnissaa Demokraatit tapersersorpaat

Demokraatit inatsisartunut ilaasortaatitaasa siulittaasuat Niels Thomsen, Inatsisartut siulittaasuat Josef Motzfeldt parteeqataalu Olga P. Berthelsen sisamanngormat ataatsimeeqatigai. Josef Motzfeldtilu piffissap kingulliup ingerlanerani pisimasut pillugit ataatsimiinnermi nassuiaateqarluni.

- Inatsisartuni siulittaasup Josef Motzfeldtip Inatsisartuni Demokraatit ilaasortaatitaanni siulittaasup Niels Thomsenip ataatsimeeqatiginerani nassuiaatigaa, AG-mit kukkusumik issuarneqarsimalluni, aviisini allanneqarmat hashimut tunngassutilinnik nammineq sunikuunngisaannarnerarsimasoq. Demokraatit ilisimavaat AG-p eqqortumik issuaasimanerminik aalajangiussisimanera, kisianni immitsinnut dommerinngortinnianngilagut kikkut eqqortumik oqalunnerat pillugu. Tamanna Josef Motzfeldtip AG-llu akunnerminni aaqqikkumaarpaat. Tamanna tunngavigalugu isumaqanngilagut uppernarsarneqarsinnaasoq Josef Motzfeldt sallusimanersoq imaluunniit sallusimannginnersoq, Niels Thomsen tusagassiuutinut allappoq, nangipporlu:

- Demokraatilli Inatsisartut siulittaasuannut, Josef Motzfeldtimut, ersarissaqqissaarpaat siunissami naatsorsuutigigipput tusagassiuutitigut kukkusumik issuarneqarsimassaguni sukkanerusumik saaffiginnissutigissagai, kaammattorlugulu tusagassiuutini saqqummernermini ersarinnerusumik attaveqartaqqullugu, paatsoortoqaqqinnginnissaa anguniarlugu, Niels Thomsen tusagassiuutinut allappoq.

Tamanna Josef Motzfeldtimit akuerineqarpoq, suliarlu Demokraatinut tamaanga naammassisoq aamma oqaatigineqarpoq.