Josef Motzfeldtip peqqarniisaarniarnerit akuerisinnaanngilluinnarpai
Nunanut allanut naalakkersuisup Josef Motzfeldt-ip nunani araberisut oqaluffiusuni peqqarniisaarnerit akuerisinnaanngilluinnarlugit oqarpoq.
-Qanorluunniit peqqarniisernerit atorlugit inuiaat paaseqatigiissinnaaneranik isumalluarnerugaluaq aserorterneqartarmat, Kalaallit Nunatsinniinngaanniit peqqarniisaarnermik taaneqarsinnaasut akuerineqarsinnaanngilluinnarput. Aamma oqaluuserineqartoq piffissami qanittumi aallarteqqinneqarmat erngertumik oqaatigivara, nunatsinninngaanniit paaseqatigiinnissaq anguniarlugu tusagassiorfiit atorlugit naalakkersuinikkullu paaseqatigiinnissamik suliniutit tassaasariaqarut ulluni makkunani suliassat pingaarnerpaat, Josef Motzfeldt oqarpoq.
Danskit ministeriunerat nunanullu allanut ministeriuneq nunani musliim-eqarfiusuni inoqarnerpaat tusagassiorfiitigut paasititsiniaaffigaat. Tusagassiorfiillu kikkuugaluarpaaluunniit paaseqatigiinnissaq siunertaralugu suliniaqatigiinnissaat pingaaruteqartoq erseqqissassallugu, Josef Motzfeldt oqarpoq. Isumaqarporli paaseqatigiinniarnissaq siusinnerusukkut aallartinneqarsimassagaluartoq.
-Tassa massakkut piffissami kingullermi oqaatigeriikkattut ministeriuneq nunanullu allanut ministeriuneq annertuumik suliniuteqarput. Kisianni isumaqarpunga paaseqatigiinniutiginissaat piaarnerusumik aallartissimassagaluarpoq, Josef Motzfeldt oqarpoq.
