Josef Motzfeldt: Sermitsiap saqqummiussinera ajuusaarnarpoq

Muuamaamik titartakkat Jyllands-Postenip saqqummiussai Aviisimi Sermitsiami saqqummeqqammersumi ilanngunneqarput. Sermitsiap taama saqqummiussinera tunngavissaqarpiaranilu ajuusaarnartuusoq, nunanut allanut naalakkersuisoq Josef Motzfeldt naliliivoq:

- Titartakkat Sermitsiakkoortinneqarnerat annertunerusumik aalassaatiginngilara titartakkat taakku nunarsuaq tamakkerlugu saqqummiussorneqareermata, Sermitsialli nammineq isummersorfiginngivillugu issuaanerinnarnik oqaasertalersorlugit saqqummiummagit aaqqissuisuata akisussaasuap nammineq taanna akisusssaaffigissavaa.

Titartakkat muuamaakkusiortullu akornanni maanna perulluliutaangaatsiarput, nunatsinni aviisi Sermitsiaq saqqummiussaqarpoq, tamanna pillugu annilaangassutissaqannginnersugut aperigatsinni Josef Motzfeldt akivoq:

- Annilaangassutissaqassagutta. Sermitsiap aaqqissuisuata nammineq ilisimasani naapertolugit nunatsini ataatsiinnarmik musliimeqarneraanera tamannalu pillugu annilaanngassutissaqanngitsugut, taama oqarnera annilaanganarpoq, inuiassuit akornanni paaseqatigiinnissaq tusagassiorfiit peqataaffigisassaat, taama ikkatsigisumik naliliinermik toqqammaveqarluni saqqummiummagu. Tassami nunarsuarmi inuiassuit assigiinngitsorpassuarnik ileqqoqarluatalu upperisaqarlutalu isiginnittariaaseqartugut akunnitsinni una takkuttoq musliiminut kisimi kalluaanani nunarsuarmiunut tamanut kalluaavoq, Josef Motzfeldt oqarpoq.

Sermitsiap titartakkanik ilanngussinera nunatsinnut kinguneqarnerlulissangaluarpat, Naalakkersuisut oqaloqatgiinnikkut aaqqiiumapput.

- Kalaallit Naalakkersuisui timmiarsiuserluta sorsukkiarnavianngilagut, pingaarnerutipparpulli oqaloqatigiinnikkulli paaseqatigiinnikkullu anguniarneqassaaq inuiassuit akornanni paaseqatigiinnissaq akaareqatigiinnermik kinguneqartussaq.

Danskinik kangiani qiterlermiittunik siorasaarisoqartareersimanera tusareerlugu kalaallit nunatta avataaniittut eqqarsaatigalugit immikkut iliuuseqalersaarnersut, aperigatsinni Josef Motzfeldt akivoq:

Assigiinngitsunik isummersortarnikkut paatsooqatigiinneq kingunerluuteqarpat , kingunerluutai ilanngullugit inooqataaffigineqartariaqarput. Pisariaqartinneqarpalli Nunanut allanut Pisortaqarfik, Danmarkimi nunanut allanut Ministereqarfik peqatigalugu paaseqatigiinnissamik siunnerfeqartumik oqaloqataanissaminut piareersimavoq.

Nunarput peqqarniisaarnianit siorasaarneqassagaluarpat susoqassava? Josef Motzfeldt:

- Siorasaarinerit nunatsinnut tutsinneqassagaluarpata, assigiinngitsunik tunuliaqutaqarluni isummersortarnerup illuatungeriinnit paaseqatigiiffiunissaa pingaarnertut suliarissavarput. Pingaartorujussuuavoq siorasaarinermut tunngatillugu eqqumaffigissallugu Sermitsiaq aviisiummat nammineertoq, akisussaasumik aaqqissuisoqartoq. Sermitsiaq taama saqqummiussigaluartoq pingaartorujussuuavoq eqqaamassallugu kalaallit inuiaat pisortatigoortumik innuttatitagoortumilluunniit taama isumaqanngimmata.

- Apeqqut Naalakkersuisut akornanni ajornartorsiutitut isigisariaqanngikkaluartoq paatsooqatigiinnikkut tamaannga killinneqarsimammat ajuusaarnarneruvoq.