Josef Motzfeldt: Nunarput kikkunut tamanut ammanerusariaqarpoq

Kalaallit Nunaat kikkunnut tamanut ammanerusariaqarpoq, suminngaanneeraluaruttaluunniit. Inuit Ataqatigiit Nuummi nuna tamakkerlugu ataatsimeersuarmata siulittaasuattut qinigaaqqittoq Josef Motzfeldt taama oqarpoq:- Nunatsinni kalaallinik ilaqarpugut angerlarsimasutut misiginngitsut, taakkuupput nunatsinni siullermik angerlarsimasutut misigitiligassagut. Taassumalu saniatigut inuiaat kikkulluunniit nunatsinni nunaqarsinnaanerannik politikkeqarnissaq pisariaqarpoq, Josef Motzfeldt oqarpoq.

Inuit Ataqatigiit nuna tamakkerlugu ataatsimeersuarnerat ippassaq unnukkut naavoq siulersuisunut qinersisoqarneratigut.

Naalakkersuisunut ilaasortat Asii Chemnitz Narup aamma Johan Lund Olsen siulersuisuunerni ilaasortaaqqilerput.

Inatsisartuni ilaasortat Aqqaluk Lynge, Ane Hansen Aqqlukasik Kanuthsenilu ilaasortatut ingerlaqqipput. Paamiuni borgmesteri Lars Sørensen aamma ilaasortatut ingerlaqqippoq.

Ilaasortat nutaat tassaapput Qaqortup kommunalbestyrelsiani ilaasortaq Lisbeth Søvndahl Petersen, kiisalu Qaanami borgmesteri Naímanngitsoq Petersen.

Taamaasilluni siulersuisuunerit avannaaneersunik kujataaneersunillu ilaasortaqalerput. Tunumit ilaasortaqanngilaq.