Josef Motzfeldt naveersippoq!

Aningaasaqarnermut naalakkersuisup ippassaq Qanoruumut oqaatigaa; Puisit amiinik canadamut pisisarnerup unitsinneqarnera isumaqatiginngikkini, taassuma taama oqarnera naalakkersuisooqatigiit mamaagaat, ullaaq mannalu qulingiluaniit naalakkersuisooqatigiit Josef Motzfeldt inissippaat.

-Hans Enoksen isumaqatigiilluarpisii?

-Paaseqatigiippugut, isumaqatigiippugut ammasumik suleqatigiinnerit ingerlanneqartassasut. Avammut nalunaarsimagutta erseqqissumik naalakkersuisooqatigiinnitsinnut oqaatigiartortassavagut, Hans Enoksen oqarpoq.

-Naalakkersuisooqatigiinnersimi innarlerneqarpaa?

-Taanna siunertaanngilaq, aamma uannut taanna siunertaanngilaq. Kisianni suleqatigiinnerup ammasumik ingerlanneqartarnissaata nukittorsarnissaa kissaatigalugu oqaatigaara, Hans Enoksen oqarpoq.

-Josef Motzfeldtimi neriorsuiva taamatut ilioqqinniarnanii?

-Naalakkersuisut tamatta paaseqatigiippugut, taamatut siunissami pisoqaqqissanngitsoq, oqarpoq.

-Tassa imaappoq, isummat eqquuppoq?

-Suu, isumaga naammassivoq.

-Qanormi Josef Motzfeldt oqarfigaajuk?

-Oqarfigaara, pakatsissutigalugu taamatut tusagassiorfinnut oqariartuuteqarmat minnerpaamilluunniit uagut ilisimateqqaarata, uffalu ippassaq pingasunut naalakkersuisut ataatsimiittugut. Tamanna pissuseq siunissami tusaqqikkusunngilara, imaanngitsoq Tuusiminngaanniit aammali naalakkersuisunit allaninngaanniit. Tamarmik taqqamani oqaatigisassatik oqaatigisalissavaat, suleqatigiinneq taamaattoq pitsaanerpaamik aatsaat angusaqarfiusinnaavoq, Hans Enoksen oqarpoq.

-Josef Motzfeldt apersorniaraluarparput itigarlutigu, oqarpoq, oqaaseqartoqassappat illiusariaqassasoq. Tassa siunissami illiinnaavissuaq oqaaseqartarniarpit?

-Naamerluinnaqqissaaq mattussisoqanngilaq, kissaatigiinnarpara naalakkersuisut isumaat allanngorlugu oqaatigineqassappat tusagassiorfitsigut tusarnagu taqqamani tamatta pineqartuminngaanniit tusartassagipput, Hans Enoksen oqarpoq.

Naalakkersuisooqatigiit ataatsimiinnerat naammassimmat, Josef Motzfeldt apersorniaraluarparput. Taannali oqaaseqarumanngilaq oqarluni; oqaaseqartoqassappat naalakkersuisut siulittaasuat oqaaseqartariaqassasoq.