Josef Motzfeldt: Namminerisamik aallartitaqartariaqarpugut
Nunanut allanut naalakkersuisup Josef Motzfeldtip Nunat avannarliit siunnersuisooqatigiit ullumi ataatsimeeqatigiinneranni nunatta namminerisamik aallartitaqarnissaanik piumasaqarpoq.
- Namminersornerunitsinni oqartussaaffiit nammineq akisussaaffigilernikuusavut Nunat avannarliit ministeriisa aalajangersaasartuini sammineqartartillugit taaseqataasarnissarput kissaatigaarput, taamaattumik namminerisamik aallartitaqalernissarput pisariaqarpoq. Nunanik avannarlernik suleqateqarnitsinni aalajangiisoqassatillugu ilaasortaqativut assigalugit taasisinnaasariaqarpugut, Josef Motzfeldt oqalugiarami taama oqarpoq.
Nunat namminersorfiusut oqartussaaffeqarnerullutik siunnersuisooqatigiinni peqataasarnissaannik misissuisussamik suleqatigiissitaliorniarlutik Nunat avannarliit ministeriuneri nunanilu avannarlerni namminersorfiusut sinniisui isumaqatigiipput. Nunat namminersorfiusut tassapput; Savalimmiut, Åland aamma Kalaallit Nunaat.
Islandimi ministeriunerusimasoq Nunat avannarliit ministeriunerisa aalajangersaasartuini qullersatut atorfinitsinneqassasoq aalajangertoqarpoq. Qullersartaaq Skandinaviap avataaneersoq siulleq taamaalilluni toqqarneqarpoq.
