Josef Motzfeldt: Naalakkersuisut aalajangiissapput
Aalisarneq pillugu nassuiaammi, Royal Greenlandip namminersortunngorsarneqarnissaa pillugu misissuinerminik nangitsinissaq, Naalakkersuisunit akuerineqarnikuunngitsoq, Josef Motzfeldt oqarpoq.
Aaliasarneq Pillugu nassuiaatip anguniakkanik assortuuttunik saqqummiussinera perulluliortitsingaatsiarpoq.
Namminersortunngorsaasinnaanissaq pillugu Royal Greenland misissuinermut piginnaatinneqariarluni illuatungaani Naalakkersuisut namminersortunngorsaasinnaanissamik misissuisoqalersinnagu aalajangernissaat utaqqimaaqqaartariaqartoq Naasuiaammi saqqummiunneqarpoq.
Naalakkersuisuni ilaasortap Josef Motzfeldtip namminersortunngorsaasinnaanissamut Naalakkersuisut aalajangiisussaatitaanerat ilumoornerarpaa.
Aalisarnerlu pillugu nassuiaammi kukkuneq aaqqissuussinerlummik pissuteqassangatikkini Josef Motzfeldt oqarpoq.
-Siorna ukioq mannalu Ataatsimeersuarnerit akornanni pisoq eqqaamasariaqarpoq. Tassa Namminersorneq Pillugu Ataatsimiititaliarsuaq isumaliutississummik saqqummiussivoq. Tassanilu inassutigineqarpoq namminersortunngorsaaneq anguniaannarlugu namminersortunngorsaasoqassanngitsoq. Inuiaqatigiilli pigisaat selskabet misissorluaqqaarlugit iluaqutissarlugu aallaavigalugu namminersortunngorsaasoqassasoq inassutigineqarpoq.
Aalisarnerlu pillugu nassuiaammi kukkuneq kukkunerinnaanngitsoq Josef Motzfeldt naliliivoq:
-Qularnanngilaq pappialat tamarmik aallaqqaammut eqqortumik nutserneqaqattaarsimapput. Katiterneratali puullaaqissutaanera kukkunermut peqqutaasimanissaa uanga ilimagaara, oqarpoq.
Suliap ingerlanneqarnerani kukkusoqarpat pisortaqarfik taassumalu Naalakkersuisoqarfia Inatsisartut inatsisaat malillugu suliamut akisussaasuusoq Motzfeldt isumaqarpoq. Erseqqissarpaali naalakkersuisut ataatsimik oqaaseqartuusarneri nalilersuiffigineqartariaqartut.
Kukkusoqarnera pissutigalugu Inatsisartuni suleriaatsip siunissami naliliiffigeqqinneqarneqarnissaa taamaatumik aamma pisariaqassasoq Josef Motzfeldtip oqaatigaa.
Royal Greenlandip ukioq manna februaarimi ataatsimeersuarnerani siunniunneqarpoq suliffeqarfiup ingerlanneqarnera namminersortunngorsaanissamut naleqqussarneqassasoq, suliallu ingerlaneranut Naalakkersuisut aalajangiissasut.
