Josef Motzfeldt: Landskarsi aningaasartuuteqaqqaartariaqassaaq

Inatsisartut aningaasanut inatsisissaat 2007-imut tunngasoq Aningaasaqarnermut Naalakkersuisup Josef Motzfeldtip marlunngorpat saqqummiutissavaa, tamannalu ukiaru politikkikkut oqallinnerup qanoq ittuunissaanik tikkuussissaaq.

Aningaasanut inatsisissaq amigartooruteqarnissamik ilimasaarivoq, tamannali aningaasaqarnermut naalakkersuisup oqaaseqarfigerusunngikkallarpaa.

Oqarporli, issuaaneq aallartippoq:

Kalaallit Nunaat imminut siunissami napatilissappat, Landskassep aningaasaatai atorlugit, siunissami aningaasartuutikillisaanermik kinguneqartussanut aningaasaliisariaqarpugut, aatsaat taamaaligutta inuiaqatigiit aningaasartuutikinnerusumik inuuneqarnissaat angussagatsigu.

Imalu nangippoq.

- Erngup nukissiuuteqarneq, angallanneq, peqqinnissaqarneq ilinniarfiillu aningaasaliiffigisariaqarput, taamaalilluta qulakkiissagatsigu sutigut tamatigut allanik isumalluuteqarata imminut pilersornissarput, aamma sulisoqarnikkut, paaviaasuniit inatsisilerituunut, Josef Motzfeldt ualiartoq radioavisimut oqarpoq.

Taanna Inuit Ataqatigiinni aamma siulittaasuusoq, Sermitsiamut tallimanngormat oqarpoq, Naalakkersuisooqatigiit partiit pingasut aningaasanut inatsisissatut siunnersuut marlunngorpat saqqummiunneqartussaq tamarmiullutik akuersissutigissaneraat naalakkersuisooqatigiiginnarnissamut aalajangiisuulluinnassasoq.

Isumaqatigiittoqanngippat pissutsit allanngussapput, Josef Motzfeldt oqarpoq, nutaamilli qinersisoqarsinnaanissaa eqqaanngilaa.

Aningaasanut inatsisissaq ukioq 2020-p tungaanut atuutissasoq aviisimut aamma oqaatigaa.

Sermitsiap HS-analysellu qinersisartunik isumasiunerata inernera tallimanngormat aamma saqqummersoq malillugu, partiit marluk Inuit Ataqatigiit Demokraatillu ullumikkut qinersisoqartuuppat siuariassasutut ilisimagineqarput. Atassummillu taasinerit allanngussangatinneqanngillat.