Josef Motzfeldt kunngikkormiunik angallassivoq
Kunngikkormiut Narsarsuarmut tikereermata Igalikumut ingerlaqqipput, tassanilu takornariartinneqarlutik. Inatsisartuni siulittaasuusimasoq Josef Motzfeldt Igalikumi angallassisuuvoq, kujataata oqaluttuassartaata ilaa kunngikkormiunut oqaluttuaralugu:
- Uannut suliakkiissutigineqartoq tassaavqo qallunaatsiaat oqaluffissaarsuaqarfiani biskoppillu illussaarsuaqarfiani illukut sinneri kusanartumik suliarineqarsimasut taakkunani angallatissallugit isiginnaartissallugit nassuiaatissallugillu qallunaatsiaqarnerup nalaani oqaluttuarisaanermi ilisimasavut sunaanersut, Inatsisartuni siulittaasuusimasoq Josef Motzfeldt oqarpoq.
AAMMA ATUARUK VIDEO Kunngissakkut Igalikumi
Kunngikkormiut Igalikumut takornarniartinneqarput
Kunngikkormiut Itillimut tikimmata Kommune Kujalliup borgmesteria Jørgen Wæver Johansen tikilluaqqusilluni oqalugiarpoq.
Nunatta oqaluttuarisaaneranut pingaarutillit Kujataani ukiorpassuit matuma siornatigut pisimapput, Josef Motzfeldtillu tamakku kunngikkormiunut ilaatigut oqaluttuarai:
- Siornali maanga nuukkamali tikeraat arlallit, tikeraartitsisulluunniit arlallit aperisarpaannga qallunaatsiaqarfiusimasut oqaluttuassartaat ukiup 1000-ip missaanninngaanniit ukioq 1500-p missaata tungaanut, tassa ukiut taakku missaanni, qanoq oqaluttuassartaqarnersut nassuiaatigeqqullugit. Taava taamaaliortarpunga, aamma taamaaliorneq nuanneqaaq, aamma oqaluttuarisaanermi tunngasut taakkua Norgellu Danmarkillu akornanni ullumikkumut killiffik ilanngullugu oqaluttuarinera soorluuna aamma paasisaqarfigilaaraat, Josef Motzfeldt oqarpoq, nangillunilu:
- Misigisimavunga ilisimalluarlugit, taavalu ilisimasat aamma inunnut allanut tunniuttariaqarnerat pisussaaffittut aamma isigigakku. Tassa pissusissamisuuginnarpoq taamatut angallasseqqusaalluni nassuiaaqqusaanera naammassisinnaasimagakku, Josef Motzfeldt oqarpoq.
AAMMA ATUARUK Kunngissakkut tikeraarnerat: Sapaatip-akunnerata naanerani pilersaarut
Kunngikkormiut Igalikumit Itillimut itivittussanngormata immikkut taanna aamma oqaluttuassartaqarpoq. Josef Motzfeldt ima oqaluttuarpoq:
- Ernerat angajulleq Christian qangali ilisarisimasarapeqatigalugu Igalikuminngaanniit Itillimut itivippugut. Taanna sunaaffa mikisunik tappavani Danmarkimi 4-hjuleeraqarsimasoq, 4-hjulerneq nalunngilluinnaqqissaarpaa, sukkalisaarniarnermillu biilit siunitsinniittut qaangerusukkaluarlugit oqarfigaara "Aamma kussinermut nakkassuutit qaangeriassagaluarukku". Nuanneqaaqm ulloq ulloqeqqata siorna ajunngitsumik ingerlavoq. Neriuppunga taakkua Nunatta sinneranut angalaarfissaminni nuannersunik naapitaqarumaartut, Inatsisartuni siulittaasuusimasoq Josef Motzfeldt, Igalikumi maanna najugaqartoq, oqarpoq.
Kunngikkormiut Alluitsup Paanut Nanortalimmullu ullumi tikeraarput, aqagulu ulloq naallugu Qaqortumiissallutik.
Paamiunut, Qeqertarsuatsiaanut Nuummullu kingorna aamma tikeraarumaarput.
