Josef Motzfeldt IWC-mut aamma isornartorsiuisoq

IWC-p Korea Kujallermi ataatsimeersuarnerani inernerit Inuit Ataqatigiit siulittaasuata Josef Motzfeldtip ilanngullugit isornartorsiorpai.

Tikaagulliusaanik kisitsinerup naammaginanngitsumik ingerlasimanerata kinguneranik piniartunut tamakku kingunipiloqartussaammata, IA-mit ujartorneqarpoq nunatsinni qipoqqaqassutsimik nalilersuinissaq, taakkumi ukiuni kingullerni 20-ni eqqissisimatitaasimammata.

Josef Motzfeldt allappoq sinerissami arfanniartartut aalisartullu qipoqqaqarluarnera nalunaarutigisaraat, taamaattumik IA isumaqarpoq qipoqqarnik eqqissisimatitsineq ukiuni 20-ni atuussimasoq maanna IWC-p naliliiffigeqqittariaqaraaa.

- IWC-p oqaluttuuttariaqarpaativut qipoqqaat eqqissisimatitaanermik kingorna qanoq amerleriarsimanersut, IA-p siulittaasua allappoq.

Inuit Ataqatigiit piumasariniarpaat qipoqqarniartaleqqinnissaq, neqissaq tikaagulliusaartassanik ikilisitsinermi annaaneqartoq taakku taarsersinnaammassuk.

Pinngortitaleriffimmi pisortaq, Klaus Nygaard, Radioaviisimut ullumi oqarpoq, qipoqqaat amerliartornerarneqarnerat uppernarsarsinnaanagu.

- Qipoqqaat amerliartornerannik inuit oqalunnerat maanngaanniit uppernarsarsinnaanngilarput, Klaus Nygaard oqarpoq.