Josef Motzfeldt Inatsisartuni siulittaasuuginnassaaq
Tallimanngormat ualikkut Siumup siulittaasuata Aleqa Hammondip piumasaraa, politiit suliamik misissuinerisa nalaani, Josef Motzfeldt Inatsisartut siulittaasuattut tunuarallassasoq.
Tamannali Josef Motzfeldtip parteeqataanit Inatsisartullu siulittaasuata tullianit siullermit Olga P. Berthelsenimit itigartilluinnarneqarpoq. Taanna tusagassiuutinut nalunaaruteqarluni allappoq, Inatsisartut Siulittaasoqarfiata tallimanngormat ataatsimiinnerani Josef Motzfeldtip siulittaasutut ingerlaannarnissaa aalajangiuppaat, apeqqutinili siulittaasoq pineqartillugu, taanna ataatsimiinnerni peqataasassanngitsoq.
Siulittaasoqarfiup ilaasortaanit tamanit taamatut aalajangiineq akuersissutigineqarpoq, matumani Siumup Siulittaasoqarfimmi ilaasortaatitaa Ruth Heilmann akuerseqataalluni.
Olga P. Berthelsenip oqaaseqaammini erseqqissarpaa, suliassaq malittarisassat najoqqutaralugit ingerlanneqarmat. Inatsisartut siulittaasuata malittarisassat najoqqutaralugit pisimasoq Inatsisartut siulittaasoqarfiannut ilisimatitsissutigereeraa, pineqartullu politiinit misissorneqarnerata nalaani siulittaasoqarfik tamatuminnga oqaaluuserisaqartillugu Josef Motzfeldt peqataasarnianngitsoq.
- Kisianni Josef Motzfeldt Inatsisartunut suli siulittaasuuvoq, taamatullu demokratii tunngavigalugu aalajangiineq Siumup siulittaasuata ataqqisariaqarpaa, Olga P. Berthelsen naggasiivoq.
