Oqaatigineqarsinnaalerpoq Inuit Ataqatigiinni ukiuni arlalinngortuni siulittaasuusoq Josef Motzfeldt ”Tuusi” ilimasaarutigineqareersutut, Inuit Ataqatigiit Kattuffiata ileqquusumik Maniitsumi juunip aallaqqaataanit pingajuanut 2007-imi ingerlanneqartussami siulittaasutut tunuarniartoq.
IA-p siulersuisuunerisa immikkoortortaqarfinnut ullumi nalunaarutigaat; partii sapaatip-akunneri pingasut qaangiuppata ataatsimeersualerpat inatsisartuni folketingimilu ilaasortap Kuupik Kleist-ip siulittaasussatut sassarnissaa innersuussutigigitsik. Taamaaliornikkut takutippaat 65-inik ukiulik Josef Motzfeldt tunuartussanngortoq.
Josef Motzfeldt IA-mi 1994-imili siulittaasuuvoq.
Kuupik Kleist 49-nik ukioqartoq, ullumikkut Inuit Ataqatigiinni siulittaasumut tulliuvoq.
Siulersuisuunerit ilanngullugu immikkoortortaqarfinnut kaammattuutigaat, siulittaasumut siulersuisuunernilu inissisimaffinnut allanut sassartitassaminnik nalunaaruteqaqqullugit.
- Eqqarsaat nutaajunngilaq, nuna tamakkerlugu illoqarfinnilu qineqqusaarnerit 20-t peqataaffiginikuuakka, partiimilu ukiut 13-it siulitaasooreerlunga siulitaasumik allamik siulitaasoqalernissaq piffissanngorunarpoq, Josef Motzfeldt taamatut naliliivoq, Sermitsiap nittartagaa malillugu.
- Maannakkullu pisortatigoortumik ilisimaneqalerpoq, partiip siulitaasuata tullia 49-nik ukiulik Kuupik Kleist siulersuisuunernit siulittaasussatut qinigassanngortinneqarmat.
- Suli 50-liineqanngikkaluarluni IA-mi ukiut 20-t sinnerlugit sullissivoq, ukiorlu 1995 siullermeerluni inatsisartuni ilaasortanngorpoq, taannalu sioqqullugu 1991-imi pisortat sulisoqarnerat angallannerlu pillugit naalakkersuisuulluni. IA sinnerlugu folketingimi ilaasortaavoq, qinigaaffiullu aappassaa maannakkut ilaasortaalluni. Folketingimut 2001-imi qinigaaqqaarpoq.
Maannakkut partiip siulitaasussaatut qinigassanngortinneqarpoq, aatsaalli qinersineq pissaaq partii nuna tamakkerlugu juunip qaammataaata allartilaarnerani ataatsimeersualerpat.
IA-mi siulitaasunngorniuttoqartarnera ileqquuvoq, IA-llu siulersuisuunerisa ullumi nalunaaruteqarnerminni sinerissami imikkoortortaqarfitik kajumissaarpaat siulitaasussatut piukkussaminnik arlalinnik innersuusseqqullugit, soorluttaaq siulersuisuunernut ilaasortassanik innersuusseqqusisut.