Josef Motzfeldt aviisimi allaaserisanut uumitsappoq

Inatsisartut siulittaasuat, Josef Motzfeldt, Atuagagdliutini allaaserisanut uumitsappoq. Politikkikkut sulinermi aningaasat tapiissutaasartut pillugit allannguutissatut siunnersuut pillugu aviisimi allaaserisaq uumitsanneranut pissutaavoq.
oktobarip 15-at 2009 10:00

Inatsisartuni partiit suli amerlanernik taperneqartalissasut aviisimi oktobarip ulluisa 13-ianni saqqummersumi allaaserineqarpoq, ilaatigut pingaarnertut allaaserisami qulequtaqartumi "Tapiissutit pisuusaarnerlu" allaaserineqarluni, quppernermilu allami allaaserisami aamma qulequtaqartumi "Partiit tapiiffigineqarnerusalissapput" allaaserineqarluni.

Aviisip naatsorsueqqissarnera naapertorlugu 3.145.000 koruuninik immikkut tapiissoqassaaq.

Tamannali eqqunngitsoq, Inatsisartut Siulittaasuat, Josef Motzfeldt erseqqissaavoq, aningaasanut missingersuut naapertorlugu siunnersuut tapiissutinik amerlanernik ikinnerusunilluunnit nassataqarnavianngitsoq erseqqissaatigaa.

- Partiit siunnersortaannut taavalu siunnersuutit aalajangigassanngortitat nutserneqartarnerannut partiit aningaasartuutaat, Inatsisartut kontoannit pingaarnermit aningaasartuutinut partiinut tapiissutaasartunut nuunneqassapput, taamaattumik siunnersuut tapiissutinik amerlanernik ikinnerusunilluunnit nassataqarnavianngilaq, Josef Motzfeldt erseqqissaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq