Josef Motzfeldt: Alliseequtit katagarlugit
Inuit Ataqatigiit ataatsimeersuarlutik aallartimmata siulersuisut nalunaarutaat siulittaasup saqqummiuppaa, tassanilu issittumi silaannaap allanngoriartornera pillugu piareersarnissaq, qinersisinnaasut ukiuisa appartinneqarnissaat, namminersulernissaq, kommunit kattussuuneqarnissaat, tusagassiorfiillu ilanngullugit eqqartorneqarput.
-Namminersulerusuppugut, taamaattumik alliseequtit katagarniarnerini iluatissassalluta pissutissaqanngilagut, IA-p siulittaasua Josef Motzfeldt oqarpoq. Taamatullu oqarnerminut tunngaviunerarpaa innaallagissamut, kiassarnermut imermullu akiuliutigineqartartut assigiikunnaarnerat ilaatigut isumaqarmat nunatta aningaasatigut nammineq napatikkiartulernissaanut, aqqutissiuussisoq,. Taamaammat G-60-ip politikkianut utersaarnertut ilaatigut isumaqarfigineqarmat, tamanna ilumuungilluinnartoq Josef Motzfeldt oqarpoq, oqaatigaalu illoqarfini nunaqarfinnilu periarfissat qissimigaarneqarnerusariaqartut.
Issittumi silaannaap kissatsikkiartornerata nassatarisaanik pingaartumik nunatsinni aalisartut piniartullu eqqorneqartussaaneri ilaatigullu eqqorneqareerneri pillugit nunatsinniit iliuuseqarnissaq aallartisarneqalereertariaqartoq Josef Motzfeldt aamma oqarpoq. Kaammattuivorlu IA-mi siulersuisunngortussat anguniartariaqaraat silaannaap allanngoriartornerata ilisimatusarfigineqarnera nunat issittumiittut suleqatigiillutik sulissutiginnittariaqartut, kiisalu Naalagaaffiit peqatigiit imaluunniit Issittumi siunnersuisoqatigiit aningaasaateqarfimmik pilersitsinissaat kissaatigalugu Josef Motzfeldt oqarpoq.
Kommuneqarfiit kattussuuneqarnissaat tikinneqanngitsuungilaq. Tassunga tunngatillugu Josef Motzfeldt oqarpoq, tamanna oqaluuserineqarluartariaqartoq, ilaatigullu kaamattuutigalugu kommuneqarfiit sisamaananngussagaluarpata pisortat suliffeqarfii sinerissami siammarnerusariaqassasut.
Siumup ataatsimeersuarneranisulli Inuit ataqatigiit ataatsimeersuarlutik aallartinneranni nunatsinni tusagassiorfiit uparuarneqanngitsuungillat. Tusagassiorfiit pisuutinneqarput tupaallannartussarsiornerarlugit, apeqqutinilu pingaarutilinni itisilerinngippallaarnerarlugit, Inuit Ataqatigit siulittaasuat Josef Motzfeldt siulersuisut nalunaarutaat saqqummiukkamiuk ilaatigut oqarpoq.
Aamma qinersisinnaasut ukiuisa 16-inut appartinneqarsinnaaneri Inuit Ataqatigiinniit anguniarneqassasoq oqaatigineqarpoq.
IA-mi siulersuisut nalunaarutaat ataatsimeersuaqataasunit unnugu oqaluuserineqassapput.
