Josef Motzfeldt aamma Johan Lund Olsen aningaaserivimmut ikisigallarnialerput
Naalakkersuisunut ilaasortat Josef Motzfeldt aamma Johan Lund Olsen, tamarmik IA-meersut, aalajangerput, aningaasat akiliutigeqquneqartut aningaaserivimmi Grønlandsbankimi kontomut ikigallarniarlugit.
IA-mut ilaasortat isumaqarput, Kukkunersiuisut Deloitte, eqqartuussissuserisut Nuna Advokater, ilassinninnermut tunngatillugu kaajallaasitaq aammalu naalakkersuisut siulittaasuata Inatsisartut Kukkunersiuinermut Ataatsimiititaanut allagaasa assigiinngitsunik, ilaatigullu imminnut assortuuttunik, pisumut naliliinerat maluginiarlugu, aalajangerput akiliutigeqquneqartut aningaaserivimmut ikiniarlugit.
Taama iliuuseqarput isumaqaramik naalakkersuisut siulittaasuata isummat assigiinngisitaartut naapitinniaqqaartariaqarai.
Taama naliliinerup takutissappagu aalajangersakkanut ileqquliunneqarsimasunullu naapertuutinngitsumik aningaasartuuteqarsimasut, tamanna tusaatissatut akuersaarumaaritsik unnerput, akiliutigeqquneqartullu aningaasartai apuuffissaanut ingerlatikkumaaritik ilanngullugu oqaatigaat.
Eqqartuussissuserisut Nuna Advokatit naapertorlugit 10.000 koruunit Johan Lund Olsen-ip atorsimavai, taakku ilassinninnermut tunngassuteqanngimmata Nunatta karsianut utertinneqassapput.
Josef Motzfeldtip akiligassai 2.000 koruuniupput.
Kukkunersiuisunit allanilluunniit aningaasartuutit taamaattut ilassinninnermut aningaasaliissutinit matussuserneqartussaanngitsutut siusinnerusukkut uparuarneqarsimanngimmata qularnartunngortinniarneqarsinnaanatillu.
