Josef Motzfeldt: aalisariutaatillit ernummatissaqanngillat
Nunatta EU-mut aalisarnikkut isumaqatigiissutaa pissutigalugu aalisariutaatillit isertitassaraluamikkut eqqugaassapput, taama nunatsinni sulisitsisut peqatigiiffiata GA-p aalisariutaatilinnut immikkoortuani pisortaq Søren Brandt, isumaqatigiissutigineqartumut iluarinninngitsoq isorinnissuteqarpoq. Aalisariutaatillilli ernumassutissaqanngillat, Aningaasaqarnermut Naalakkersuisoq Josef Motzfeldt oqarpoq:
-Naalakkersuisuninngaanniit pingaartipparput isumaqatigiiniarnerit poortukkatut ataatsitut arlalissuarnik immikkoortortallit, inuiaqatigiit isaanninngaanniit isigalugit, avataasiortullu ataasiakkaat isaanniinngaanniit isiginagit, inuiaqatigiit aningaasaqarniarnerannut iluaqusiinissaat.
Nunatsinni aalisartut isorinnittut isorinninnerminnut tunngavigisaat ersarinnerusariaqartoq, Josef Motzfeldt isumaqarpoq.
-Aalisartut pisassaminnit ataatsimilluunniit ilanngartuiffigineqarnavianngillat. Oqaraluarunilluunniit Landskarsi ajugaasoq avataasiortullu ajorsartut. Taamaammat ineriartoqqinnermut pilersaarut sunaana eqqartoraat?
Aalisarnerup qanoq ineriartorteqqinneqarnissaanut GA-ip aalisarnermut immikkoortuanit pilersaaruteqarnersut ataatsimilluuniit suli tusagaqarfiginikuunngikkitik Josef Motzfeldt oqarpoq. Avataasiutaatillit pisassamik amerliallatsittarnissaat ujartorpasinnguatsiaraat Josef Motzfeldt eqqoriaavoq. Taamaattumik aalisarnerup siunissami qanoq ingerlanneqarnissaa pillugu pilersaarusiornissamut avataasiutaatillit aalisarnermullu attuumassuteqartut tamat suleqataanissaannut Motzfeldt qaaqqusivoq.
Nunatsinni aalisartut piaaffigineqannginnissaannik oqarnini Josef Motzfeldtip ima tunngavilersorpaa:
-1985-imi EU-mut aalisarnermut isumaqatigiissummi siullermi EU 175.000 tonsinik pisassinneqarpoq massakkullu taamaallaat aalisakkat 94.000 tonsit naligi EU-mut tunniunneqarput.
