Josef M: Qangali isornartorsiutigineqartut uparuarneqarput

Innaallagissap kiassarnerup ernngullu akiisa assigiikkunnaarsinneqarneranni 2009 ilanngullugu ikaarsaariarfeqarpoq. Tassungalu atatillugu isumaqatigiissutaavoq akit allanngoriartorneranni ilimaginngisamik atuisunut kinguneqartoqalissappat tamakku naalakkersuisunit iliuuseqarfigineqartassasut. Taamaattumik sangujoraarluni ingerlasoqanngitsoq, Aningaasaqarnermut naalakkersuisoq Josef Motzfeldt Demokraatit isornartorsiuinerannut taama akissuteqarpoq. Josef Motzfeldt ima tunngavilersorpoq:

- Akit assigiikkunnaarsinneqarnerat ingerlaannarpoq, kisianni nunarsuarmi uuliap akuiarneqanngitsup akiata pingasoriaatinngorluni qaffassimanerata kingunerisaanik, naalakkersuinikkullu kialluunniit ilimagisimanngisaanik, innaallagissap akisuninngorfimmini akia akimorneqarpoq. Tamanna pillugu innaallagissamik kiassartut ilauqusiullugit nukissiorfiit isaatitaasa ilaat 12,5 millioni koruunit nunaqarfinni illoqarfinnilu akisunerulerfiusussanut akikillisaatitut atorneqassasut, naalakkersuisut siunnersuuteqarput. Taannalu 2004-imi inatsimmik aalajangiinikkut upalungaarsimaffigineqartussatut aalajangiunneqareermat tupaallannartoqanngilaq.

Josef Motzfeldtip aamma eqqaamaqquaa Nuummi innaallagissap februaarip aallaqqaataaniit kilowattimemut 1,58 øreqalertussaanera, nunaqarfinnilu akisunerpaaffinni 3,09 øreqalertussaanera.Uuliap akitsorneratigut nunaqarfimmiut Nuummiunit marloriaatingajammik akiliisalertussaangaluit oqisaanneqassapput innuttaasut akornanni naalakkersuisullumi isummersormata innuttaasut nammaqatigittariaqarnerannik.

Nuummi innaalagissamik kiassartut annertunerusumik qaffannavianngillat Josef Motzfeldt erseqqissaavoq:

- Taamaallaat uuliatortutulli akip qaffanneranut malinnaasussatut Inatsisartut aalajangernerat malinneqaannassooq.