Josef Fritzl-imik eqqartuussineq aqagu aallartissaaq

Unnerluutigineqartoq tassaavoq Josef Fritzl, ukiuni 24-ni panimminik kiileriminni parnaarusimannissimasoq.

Unnerluutiginnissutigineqartut amerlaqaat, taamaattorli qanorluunniit sakkortutigisumik pineqaatissinneqaraluarpat, illoqarfimmi Fritzl-ip najugaqarfigisimasaani Amstettenimi innuttaasut naammaginavianngilaat.

Josef Fritzlip najugaqarfigisimasaata eqqaani najugalinnut pillaatisiassaq naleqquttoq suussanersoq nassaariuminaappoq.

- Angummut tassunga, nunarsuatsinni pillaammik naleqquttumik soqanngilaq, Günther Haller, Fritzlip illorisimasaanit 10 meteriinnarnik ungasissusilimmi pisiniarfiutilik oqarpoq.

Taassuma pisiniarfiutiminut taama qanitsigisumi ukiunilu taama amerlatigisuni taamatut pisoqarsimanera suli quarsaaqqassutigaa.

Josef Fritzl toqutsisimasutut, inussiaateqarsimasutut, qanigivallaakkamik atoqateqarsimasutut, kiffaanngissussiiaasimasutut 3.000-inillu amerlanerusunik pinngitsaaliilluni arnerisimasutut unnerluutigineqarpoq – ukiullu 15-it imaluunniit inuunini naallugu parnaarussassanngortinneqarsinnaasoq, inatsisinut pillaanermut tunngasunut immikkut ilisimasallip Helmuth Fuchsip Wienimi universitetimeersup oqaatigaa.

Inuunini naallugu parnaarussassanngortinneqarnissaanut imaluunniit ukiuni 15-ini imaluunniit 20-ni parnaarussassanngortinneqarnissaanut, matumani apeqqutaassaaq, meeraaqqamut inunngornerminit ullut pingasut qaangiunneranni anersaartorniarnikkut ajornartorsiuteqarluni toqusumut, toqutsisutut pisuutinneqassanersoq, Helmuth Fuchs oqarpoq.