Jorsi Sørensenimut katersuiniarneq iluatsilluartoq
Inuit 1000-t sinnerlugit nipilersortartut nuannarineqarluartut Zikaza, G-60, Inua, Kimia, Qarsukkut allallu tusarnaariarpaat, aningaasallu 73.000-it koruunit, Jorsimut Stinamullu katersorneqartut, katersuiniarnermik aaqqissuussisup, Jorsip ukiorpassuarni ikinngutigisaa Nunatsinnilu nipilersortartoqatigisaa, Eigil Petersen oqaluttuarpoq. Eigilip aaqqissuussinerup inernera nuannaarutigeqalugulu tulluusimaarutigaa.
- Aaqqissuussinerup tapersersoneqarnissaa naatsorsuutiginikuuara, taamali annertutigissangatinngikkaluarpara. Taamaammat nuannaaqaanga qujamasoqalungalu, Eigil Petersen killitsissimaarluni KNR-imut oqarpoq.
Jorsi Nunatsinni nipilersornerup iluani imminut pilliutigaluni tunniussaqarsimaqaaq, Jorsillu nuannarisaminik aallutaqarniassammat nulia Stina aamma pilliuteqarsimaqaluni.
- Jorsi nulianilu piffissami artornartumi taperserneqarnissaminnik pisariaqartitsineranni taamaalillutik utertitsiffigineqarput. Nipilersornermummi pilliuteqarnikooqaat, Eigil oqarpoq. Taassuma inuit taama amerlatigisut Stinamut Jorsimullu taperseerusussimanerat qujamasuutigeqaa.
Nappaassuarmik eqqugaasimasut eqqarsaataaniittut
Eigil Peterseni nipilersornerullu silarsuaani ikinngutai nukippassuarnik atuinngikkaluartik aningaasarpassuarnik katersipput.
- Ilaqutariit nappaassuarmik kræftimik eqqugaasimasut eqqarsaatinniipput. Nappaassuarmik taama eqqorneqarnermi aningaasaqarneq ilungersunarsinnaavoq. Tamaasalu ikiorusukkaluarpakka, akisussaaffilli taanna uanga kivissinnaanngilara, Eigil oqarpoq.
- Aalajangiusimalluarnikkut suleqatigiilluarnikkullu piffissami sivikitsumi annertuumik angusaqarsinnaaneq takutipparput.
Jorsip Stinalu qujamasuttut
Jorsi Stinallu qujamasunnertik oqariartuutigaat.
- Qujanarujussuaq peqataasunut tamanut tapersersuisunut tamanut qujanarujussuaq. Assut tuppallernarpoq qamuunalu attorteqaagut tapersersuisut taamak amerlatigimmata. Isumaqanngikkaluarpugut taamarsuaq pineqassalluta, qanoq qujassanerpugut.
- Peqqisseqqeriarpat arlaatigut inuiaqatigiinnut qanoq utertitseqqissanerluta eqqarsaatersuutigiumaarparput, maannakkummi peqqisseqqinnissamik ukkassivugut nunatsinnut inunnut kissalaartunut ajorata angerlaqqinnissaq ukkatarigallaratsigu. Juullimi ukiortaassamilu pilluarisi - immissinnut paaralusi, Stina Jorsilu KNR-imut allapput.
AAMMA ATUARUK Nipilersortartoq kræftertoq katersuiniullugu tusarnaartitsilersut
