Jørgen Erik Andersenip mittarfik 1979-imi ammarpaa: Nuummiit Nuummullu taamani timmisartoqarpallaanngilaq
Nuuk sisanngormat aallartitsivioqqippoq. Susoqarnera ilisimanngikkaanni qaammammut mittoqarsorineqarsinnaavoq. Atlantikorli qulaallugu timmisartorsuaq illoqarfiit pingaarnersaannut miinnaraluartoq immaqa aamma taama oqartoqarsinnaavoq. Københavnimmi Nuullu akornanni toqqaannartumik aqquteqalerneratigut siunissamut matut ammarneqarput, angalanissarlu ajornaannerulersinneqarluni.
Kingumilli qiviaqqikkutta – illoqarfiit pingaarnersaanni timmisartoqannginneranut ukiorpassuit uteqqissanngilagut. Nuummi 1979-imi mittarfittaarpoq, Jørgen Erik Andersenilu tassani ammaasseqataavoq.
Taanna AFIS-operatøriuvoq, taamaammat taanna mittarfiup nakkutilliiviani napasuliamiittarpoq.
- Ulloq pingaaruteqarnikooqaaq. Illoqarfimmut uagutsinnullu peqataasunut, taanna oqarpoq.
- Nunatsinni illoqarfiit akorngini qulimiguulimmik ukiorpassuarni angallaviunikuuvoq, taamanilu timmisartunut mittarfimmik ammartussanngorpoq, taassuma taamanikkut pisoq taama oqaluttuaraa.
Kisiannili nakkutiginnittarfimmi taama ulapittarsimatiginngilaq.
- Immaqa pikkunaalaarpoq. Ullumikkutut angallatsigisoqanngilaq. Taamani Grønlandsflymik ateqarpoq, angalasoqarpallaaranilu.
Grønlandsfly 2002-mi Air Greenlandimik ateqalerpoq.
Nuussuaq sanaartorneqaleruttortoq
Taamani timmisartut aallartarneri tikittarnerilu issittumi illoqarfiup pingaarnersaanni pissutsit allaanerusimaqaat.
- Taamani Nuuk ullumernit mikinerujuunikuuvoq, Godthåbhallenimi taamani qaangeqqanngilaa. Nuussuaq sananeqarluni aallartinneqalaarnikuuvoq. Air Greenlandilu Qaavami illunik uiguleriiaanik sanalluni aallarteqqammerpoq. Inuit taamani imminnut tamangajammik ilisimapput, Jørgen Erik Andersen taama oqarpoq.
Maannakkullu mittarfik ukiunik 45-nik pisoqaassusilik tamaanga killeqarpoq. Politikkikkut assortuunneq sivisooq pereersoq nunatsinni mittarfinnik pingasunik peqalissasoq Danmarkip nunattalu 2018-imi atsioqatigiissutigaat. 700 millionit koruunit akigitinneqarput. Kingornali aki taaneqartoq annikippallaartoq paasineqarpoq, taamaasillunilu saniatigut 900 millionit koruuninik atorniartoqartariaqarluni. Katillugu akia taamaalilluni 4,5 milliardit koruuniuvoq.
Nutaamik mittarfittaarnissamut piffissanngortoq
Atlantikoq qulaallugu timmisartorsuaq Nuummut siullermeertumik sisamanngormat mippoq aallarlunilu. Tamannali Jørgen Erik Andersenimut tussunngunarpallaanngilaq.
- Ukiuni 45-ni mittarfitoqqap piunerani eqqarsaatigisarpara Nuummi mittarfimmik angisuumik peqalernissaa piffissanngussasoq. Atlantikukkut angalasut amerlanerpaartai Nuummut mittarput. Taamaattumik eqqarsaatigisarpara mittarfimmik anginermik ammaasoqarnissaa piffissanngussasoq, taanna taama oqarpoq.
Mittarfiup nutaap ammarnissaa piffissanngorpoq. Siusinnerusukkut ammaasoqarnissaa ilimaginikuugaluarpara, kisianni maanna peqalerpoq – nuannaarutiginiartigu.
