Jordbærit hindbærillu aappaagumiit tunisaalissapput
Upernaviarsummi misilittaavimmi upernaaru naatitsivimmut ikkussuunneqartussat pillugit siunnersorti Kenneth Høegh ima oqarpoq.
- Kommune Kujallerminngaanniit ukioq manna aningaasaliiffigineqarluni drivhusi plasticimik sanaaq Skotlandimeersoq misilipparput. Ajunngitsumik ingerlasimammat taanna atorneqassamaarpoq.
Naatitsivik sullorsuartut suliaq 120 kvadratmeteriuvoq. Tassanilu Upernaviarsummi naatsiivilerisup jordbærit 300-t hindbærillu 100-t ikkussuullugit upernaaru aallartissavai.
- Takussavarput jordbærinik hindbærinillu naatitsineq iluatsinneqarsinnaanersoq. Aamma niuertarfinni akiginiaaneq aningaasatigut akilersinnaanersoq misissussagatsigu, Kenneth Høegh oqarpoq.
Paarnat nunanit allaneersut timmisartukkut tikisitat ilaanni asiulereersut niuertarfinni pineqarsinnaasarput.
- Takorloorsinnaavara nutaajunerusunik jordbæriuteqassasugut. Tassa taanna siunertaavoq.
Kenneth Høegh neriuppoq aappaagumiit tunisaqarsinnaalissallutik. Aamma paarnat nunatsinni naasartut - kigutaarnat, kimmernat paarnallu qernertut - naatsitsivinni naatillugit tunisassiarineqarsinnaalernissaat neriutigaa.
Island, Savalimmiut, Norge Kalaallillu Nunaat misileraanermi peqataapput.