Jonathan: Qinersinerni tamani ajugaasoqarlunilu ajorsartoqartarpoq

Jonathan Motzfeldt ullumikkut ima oqarpoq:

- Soorunami qinigaanngitsoornera inuttut ajuusaarutigisinnaavara, kisianni kingumut qiviaruma Kalaallit Nunaanni ineriartornermik annertoorujussuarmik peqataasimanera inuttut nuannaarutigaara. Nuannaarpunga maannakkut inuttut imminut isumagalunga, peqqillunga inuunera ingerlaqqissagakku.

2005-imi 520-nit qinersiseqariarlutit maanna 91-iinnarnik qinersiseqarputit, inatsisartunut iseqqinngittoorlutit, qanoq tiguiuk?

- Politikkimi inuuneq taamaappoq, ilaannikkut qullarfissaqarluta aamma apparfissaqartarpoq, taanna tupinnartuliaanngilaq, taamaattoq oqartariaqarpunga ukiut taakkua qanorluunniit oqimaalutarlugit pigaluarutta, ukiuusimapput Kalaallit Nunaata allanngorneranik angisuunik nammataqarfiusimasut. Uagullu inuttut atugarliuutinik angisuunik atugaqarfigisimasagut, Jonathan Motzfeldt taama oqarpoq.

Taassuma naalakkersuinikkut pissutsit imaaliallaannarluni qimassinnaanngikkai malunnarpoq. Qinersinermi ajugaasut Inuit Ataqatigiit pilluaqquai neriulluni ammasumik oqaloqatiginnillutik amerlasuunik peqateqarlutik naalakkersuisunngortitsissasut.

- Isumaqarpunga Kalaallit Nunaanni maannakkut suliassat ima pissanganartigalutillu ilungersunartigissasut aamma, silittumik naalakkersuinikkut suleqatigiittoqartariaqarluni, taamaalillunilu qularnaatsumik alloriarneq taama ittoq ingerlaqqittariaqarluni, nunatsinnut pingaaruteqaqimmat. Aammalu uagut tungitsinninngaanniit tunuaamiffissaqassagutta aamma tunuaammissaagut, aamma illuatungitsinninngaanniit ajugaasimaneq atuinnarlugu pisssaanermik qulaaninngaanniit naqissisoqassanngitsoq neriuppunga. Ukiuni 38-ni ingerlatiinnarlugu naalakkersuinikkut siuttunut ilaareerluni qinigaaqqingitsoortoq, Jonathan Motzfeldt taama oqarpoq.