Jonathan Motzfeldt utoqqatseqquneqarpoq

Inatsisartut siulittaasuata Jonathan Motzfeldtip tallimanngormat unnukkut ilasseqatigiinnermi qunusaarisimanera tunngavigalugu, demokraatit inatsisartunut ilaasortaatitaat Jens B. Frederiksen inatsisartut siulittaasoqarfiannut naammagittaalliuteqarpoq.

Jens B. Frederiksen ima oqarpoq:

- Oqaatsit sakkortuut atorlugit Jonathan Motzeldtip saassuppaanga. Kamappasittorujussuulluni, tikkuartaqattaarlungalu. Oqarluaannarluni suutinnanga, Demokraatit suutinnagit. Tikilluaqqusaanata paasigatsigu Hans Egede-p Illuanit ajoraluartumik aniinnartariaqarsimavugut, Jens B. Frederiksen oqarpoq, nangipporlu:

- Inatsisartut siulittaasuat ataqqineqarsinnaasuusariaqarpoq, tallimanngormallu iliuuserisaanut tunngatillugu taamatut pissuseqartarnini takutiinnarpaa. Ataqqinaatsutut pissuseqarnera akuerineqarsinnaanngilaq, inatsisartullu siulittaasoqarfiat Jonathan Motzfeldtimut oqaaseqarsinnaasariaqarpoq, Demokraatit sinnerlugit inatsisartuni ilaasortaq Jens B. Frederiksen oqarpoq.

Pisimasoq pillugu Jonathan Motzfeldt oqaaseqartinniaraluaratsigu iluatsinngilarput, ullaap tungaani ataatsimiimmat.