Jonathan Motzfeldt: ullormik allamik piumasaqartoqanngilaq

Kommunit kattussuunnissaat pillugu inatsisartuni marsip ulluisa qulingiluaanni ammaanersiorneq eqqorlugu eqqartuinissaq, Inatsisartuni ilaasortaasut partiivisa arlaannaataluunniit ullormut allamut nuuteqqullugu kissaatigisimanngilaat. Bruxelles-imut angalanissaq KANUKOKA-p qaammaterpassuit sioqqullugu piareersarsimavaa, taamaammallu kommuneqarfinni arlalinni eqqumiigineqarpoq, kommunit kattussuunnissaannut tunngasoq borgmesterit angalanerisa nalaanni inatsisartuni eqqartorneqassammat. Inatsisartut siulittaasoqarfiani siulittaasup, Jonathan Motzfeldtip, pisut ima nassuiarpai: - Kommunit kattussuunneqarnissaannut tunngasup ataatsimiinnerup aallaqqaaterpiaani pinissaanut patsisaavoq, kommunit kattussuunnissaannut tunngatillugu apeqqutit pillugit ataatsimiititalianik pilersitsisoqartussaammat. Soorunami sammisassap ullormut allamut nuutinneqarnissaa partiit piumasarissappassuk, tamanna mattunneqanngilaq, taamaaliortoqarsimanngilarli, Jonathan Motzfeldt oqarpoq. Ataatsimiinnissamut siunnersuut Inatsisartuni siulittaasoqarfiup februaarip ulluisa 15-ianni nassiuppaa.