Jonathan Motzfeldt: Svend Auken Nunatta Danmarkillu akornanni paaseqatigiinnissamut pingaaruteqarpoq

Namminersorneruneq pillugu isumalioqatigiissitami oqaloqatigilluartarsimavaa, aatsitassarsiornikkullu Danmarkip Kalaallit Nunaatalu akornanni suleqatigiinnissaq pillugu suliamik inaarsaaqatigisimallugu.

- Svend Auken Danmarkimi politikerit ukiuni kingullerni nuimanerpaanut ilaasutut taarusuppara, silap pissusaata allanngoriartornera pillugu misissuinissamik avatangiisinut ministeriunermini Kalaallit Nunaat Svend Aukenip aamma ilanngussimavaa, Jonathan Motzfeldt oqarpoq.

Danmarkip Kalaallit Nunaatalu naalagaaffeqatigiinnerat pillugu Svend Aukenip oqaaserisartagai, Jonathan Motzfeldtip eqqaavai:

- Danmarkip Kalaallit Nunaatalu naalaagaaffeqatigiinnerat nassuiaraangamiuk nassuiartarpaa oqarluni: Imaaginnanngilaq inuiaat marluk imminnut ilisarisimanngitsut oqaloqatigiittut, kisianni imminnut ilaqutariittut oqaluttuarisaanermilu ataatsimoorlutik ineriartorsimasutut oqaloqatigiittut. Taamaammat naalagaaffeqatigiinneq kinguneqassappat paaseqatigiinneq eqqortoq aammalu tamatta naligiimmik ilaaffigisassarput angusariaqarparput, naalakkersuisut siulittaasorisimasaat Svend Aukenimik eqqaaniaanermini oqarpoq.

Svend Aukenip nulia Anne Wivel Jonathan Motzfeldtip aamma eqqaavaa, aappariit Nunatsinnik soqutiginnillutillu nuannarinnittuunerat oqaatigalugu.