Jonathan Motzfeldt: Qaqortumi mittarfiliortoqapallattariaqarpoq
Qaqortup pisortanit ineriartortinneqarnissaata unitsinneqarsimanera aallarteqqinniarlugu 1200 meterisut takitigisumik mittarfittaarnissaa Jonathan Motzfeldtip inatsisartunut maanna siunnersuutigaa.
Illoqarfiit anginerit siuarsaaffiginissaanni Qaqortoq ilanngunneqaraluaq, maanna unittoortutut ippoq. Siunniussaagaluit unitsillugit imaluunniit kinguartseqattaarlugit pisoqaqattaarpoq. Qaqortullu mittarfiliorfiginissaanut inissisimaffiit siunniussaasimasut iluarineqanngillat, taamaammat periarfissat nutaat malillugit piaarnerusumik Qaqortoq suluusalinnut mittarfittaartariaqartoq siunnersuuteqartoq Jonathan Motzfeldt isumaqarpoq.
Kujataarmiut utaqqeqqittariaqanngitsut Jonathan Motzfeldt oqarpoq, naalakkersuisullu angallanneq pillugu siunniussaat malitsigitillugit Qaqortumi suluusalinnut mittarfiliornissaq piaarnerusumik aallarnerneqartariaqarnerarpaa.
Qaqortumut qulimiguulimmik angalaneq assartugassanillu assartuineq ullumikkut akisuujuvoq.
