Jonathan Motzfeldt pillugu eqqaaniut - Nunatta erneratut ataqqinassusilik

Juntaaq taasaavoq kalaallit politikkikkut siuttuat avammullu ajungitsutigut ajortutigullu kiinarisimasarput ukiut 40-t sinnerlugit.

Juntaap nunatta politikkikkut namminersoriartuaalernera tamaat siuttuuffigaa aammalu EU-mit aniniarnitsinnut atatillugu isumaqatigiinniarnerni sallersaasimalluni. USA-p nunatsinni sakkutoorqarfeqarnera pillugu attaveqartarnermi annertunermillu malinnaatinneqarnissaq pillugu kimigiisernerup nalaani ilungersunartumik suliaqarsimavoq kiisalu naggueqatigiit Inuit ICFCV aqqutigalugu suleqatigiinneranni annertuumik sunniuteqarsimavoq naggueqatitsinnullu avammut kiinnerluartarsimalluni.

Politikkikkut siuttutut suliani annertuuni tamani Jonathan Motzfeldip angusai inornarput.

Kalaallit Nunaata Danmarkillu akornanni suleqatigiinneq naligiinnerusoq sulinermini tunaartariuarsimavaa.

Nunatsinni partiinik assigiinngitsunik suleqateqarsinnaaneq ilungersunartoq aamma siuttuuffigisarsimavaa, ikinngutitaarfigisaminik imaluunniit nutaanik akerartorteqarfigilikkaminik.

Politikeritut inuunerup ullumikkutut isikkoqalersimanera Jonathan Motzfeldt akisussaaqataaffigaa. Tamanna Jonathan Motzfeldtip nalunngilluinnarpaa. Oqaasinnaaq de Gaulliugunartup anissimasaa nuannaarisaa tassa: Akeqqakka taakku ernumananngillat, isumagissaqqaarpakka, parteeqatikkaaku kisianni ilungersunartut!

Inuk sivisuumik politikkikkut ilaatigut ilungersunartumik suleqatigisimasaq illuatungerisimasarluunniit inuunerup ilaani ikinngutigilersinnaagaanni tamanna takussutissaavoq politikerip inuttaa uummateqartuusoq asannissuseqarlunilu, tamatuma takutippaa Juntaap inuppalaassutsi, ilaatigut nukittussutaasartoq aammali sanngiissutaasartoq inummut akisoqisumik kingunilimmik pilliuteqarfiusumillu.

Juntaarmi Nunatta erneratut ataqqinassuseqarpoq aammami ila allaat oqarsinnaavugut imminut akigisimavoq.

Qujaniarta inooqateqarsimagatta Juntaatut ittumik.

Kalaaleq nalinginnaasoq - politikeritulli imaannaanngitsoq (soorlu inuusuttuulluni sunngorniarnini pillugu taama allassimasoq).

Ukiorpassuarni suleqataasoq ikinngutaasorlu, Aqqaluk Lynge.