Jonathan Motzfeldt oqaaseqarumanngikkallarpoq

Rasmus Frederiksenip tunuarnera naalakkersuisunilu pisut Siumup politikkikkut siulittaasuata tulliata Jonathan Motzfeldtip oqaaseqarfigiumanngilai. Jonathan Motzfeldt nunat avannarliit killiit siunnersuisoqatigiiffiata ippassaq aallartittumik Islandimi ataatsimiinnerani peqataavoq, inatsisartuni ilaasortaaqatini marluk, tassalu Doris Jakobsen aamma Enos Lyberth, tamarmik Siumumeersut peqatigalugit. Taakku tamarmik ulloqeqqata siorna oqarasuaatikkut ataatsimiipput, kingornatigullu oqaaseqarumanatik.

- Suliassanik aqutsineq agguataarinerlu naalakkersuisut siulittaasuata suliassarai, taamaattumik Rasmus Frederiksenip tunuarnera tusaatissatut tigugallarpara. Jonathan Motzfeldt oqarpoq.

Kujataanilli Islandimut uterlugulu timmisartuussinermut tunngasoq oqaaseqarfigiumavaa.

- Periarfissaq tamanna pingaaruteqarmat attatiinnarneqartariaqarpoq, Jonathan Motzfeldt erseqqissaavoq.

Islandimiut aningaasaleeqataarusupput, apeqqutaavorlu, Aningaasanut Inatsisissap naammassineqarnissaa.

Aqqulli attatiinnarneqassanngippat taamaatiinnarnerussasoq Jonathan Motzfeldt isumaqarpoq, tamatumunngalu Islandimiut isumaqataapput.