Jonathan Motzfeldt: Misissuisoqartariaqarpoq
- Inatsisartunut ilaasortat tamatta unnerluutigineqartutut misigisimavugut. Taama eqqarsarnarpoq. Uppernarsaatissanik ulloq manna tikillugu saqqummiussisoqanngilaq. Taamaattumik inuit avataaninngaanneersut isumaqarput inatsisartuusugut taamaalioqattaartugut. Taamaattoqanngilaq, taamaattumik Lars-Emil Johansenip uagut sinnerluta kissaataa malinneqartariaqartoq, tassa misissuisoqarnissaanik taanna kissaateqarami, Jonathan Motzfeldt oqarpoq, nangipporlu:
- Suleriaatsitsinnut ilungersunarpoq. Suleriaaserput inatsisartut akuerinikuuaat imaattoq. Taasinermi inatsisartunut ilaasortaq issiavimminiissaaq, aamma taanna atuuppoq toortagaq tuuginnarluguluunniit iliussagaluarutta. Allat sinnerluta taasisinnaanngillat, ini iluani imaluunniit tuuginnarluguluunniit iliussagaluarutta. Taanna malittarisassanik uniuineruvoq, Jonathan Motzfeldt oqarpoq.
Taasisitseriaatsip nutaap atuutilersinneqarnerani atortut nutaat atorneqarput, tamannalu ilaatigut pissutaatinniarneqarluni. Taamaakkaluartoq misissuisoqarnissaa Jonathan Motzfeldtip attappaa.