Jonathan Motzfeldt: Kukkusoqanngilluinnarpoq

Inatsisissanik siunnersuuteqarnermi malittarisassat aalajangersimalluinnartut inatsisartunit atorneqartarput, soorlu aamma apeqquteqaateqarnerit ilusaat aalajangersimalluinnartut. Ippassarli nikiallattoqarpoq.

Inatsisartut ataatsimiinneranni inatsisissatut siunnersuutit aalajangersimalluinnaqqissaartumik isikkulerlugit suliarineqartaraluarput. Ippassarli Astrid Fleischer Rex-mit nappaatillit ilaqarlutik Danmarkiliartarnissaannut oqallisissiaa minutsit 20-it ingerlaneranni oqallisissiamiit inatsisissamut allanngortinneqariataarpoq siulittaasup Jonathan Motzfeldtip suliap ataatsimiititaliamut suliarisassanngorlugu nalunaarutigimmagu. Kukkusoqarsimanersoq Jonathan Motzfeldt aperineqarami ima oqarpoq.

-Ippassaq taamatut aalajangerparput. Saqqummiussorneqartut tunngavigalugit udvalgimi suliarineqarnissaanut inatsisartuni ilaasortat akerliunersut aperineqarput. Akerliusoqanngilarlu. Oqallinnermi sumiluunniit aqutsisoq misigisimaguni saqqummiussorneqartut erseqqinnerusumik akissuteqarfigineqartariaqartut inatsisartunut apeqquteqarsinnaavoq udvalgimut oqallisigineqartoq ingerlateqqinneqarsinnaanersoq. Akerliusoqannikkaangat suliassaq udvalgimut ingerlateqqinneqartarpoq. Unioqqutinneqanngilluinnarput. Suliassaq pissusissamisut ingerlanneqarnikuuvoq, Jonathan Motzfeldt oqarpoq.

Inatsisartut allattoqarfiani inatsisilerituumit ilisimatinneqarpugut oqallisissiat ataatsimiititalianut ingerlateqqinneqarsinnaanngitsut, kisiannili ataatsimiititaliat namminneq suliat assigiinngitsut suliassamittut tigusinnaagaat ilaanngullugu ilisimatitsissutigaa.

Partiit amerlanerit ataatsimiititaliamut ingerlateqqinnissaa akueraat naak Kattusseqatigiit Partiiata eqqaagaluaraa apeqquteqaataammat aalajangiiffissatullu saqqummiunneqarani aatsaat ukiamut aalajangigassatut saqqummiunneqartariaqaraluartoq.

Peqqinnissamut ataatsimiititaliap siulittaasuata Jens Lars Fleischerip ukiaru inatsisartut ataatsimiinnissaanni aalajangiiffissatut siunnersuutigineqarnissaa oqaatigaa.