Jonathan Motzfeldt isornartorsiorneqangaatsiarpoq
Qaqortumi mittarfiliortoqarnissaanut siunnersuut oqallisaangaatsiarpoq, Inatsisartullu siulittaasuat Jonathan Motzfeldt oqallinnermut peqataalluni.
Qaqortumi mittarfiliortoqarnissaa taassuma kissaatigaa.
Inatsilli siunnersuummut tunuliaqutaatinneqartoq allanngortinneqareersoq Inuit Ataqatigiit politikkikkut oqaaseqartartuat Josef Motzfeldt oqarpoq:
- Inatsisartut inatsisaat qanoq allanngorarneriluunniit misissorluaqqaanngivillugit Inatsisartut siulittaasuat piumasaannarmik inuiaqatigiinnut taamatut oqalussinnaammat ilungersunarpoq, Josef Motzfeldt oqarpoq, nangipporlu:
- Naalakkersuisunut ilaasortaq Kim Kielsen eqqunngitsumik toqqammaveqarluni Inatsisartunut Qanoruukkullu inuiaqatiginnut qujasaasinnaanera ilungersunarpoq, Josef Motzfeldt oqarpoq.
Inatsit pineqartoq tassaavoq Timmisartunut suluusalinnut mittarfinnik sanaartornissaq pillugu Inatsisartut inatsisaat nr.4, 12.juni 1995-imeersoq.
Qaqortumi mittarfiliortoqarnissaa taamanikkut pilersaarutaavoq, inatsilli pineqartoq 1997-imi allanngortinneqarmat Qaqortoq peerneqarluni.
Josef Motzfeldt parteeqatiminit Asii Chemnitz Narupimit tapersersorneqarpoq.
- Inatsisartut Siulittaasuannut tulluanngilluinnarpoq ataqqinaatsumillu takutitsinerulluni partiip aalajangersimasup soqutigisaannai tunngavigalugit illoqarfiup ataasiinnaap soqutigisai isiginiassagunigit, Asii Chemitz Narup oqarpoq, Folketingillu siulittaasorisimasaa Erling Olsen assersuutigalugu.
- Erling Olsenip siulittaasutut inissisimanermini Socialdemokratit Folketingimi ilaasortaatitaannit attavigineqarsimanini assersuutigivaa, taakkunanngami Erling Olsen suliassap aalajangersimasup suliarineqartariaqarnera pillugu qinnuigineqarsimavoq. Sulialli suliarineqarnissaanut qinnuteqaat Erling Olsenimit itigartitsissutigineqarsimavoq.
- Jonathan Motzfeldt, Folketingip siulittaasua ilinniarfiginiaruk! Inuit Ataqatigiit naatsorsuutigilluinnarpaat Inatsisartuni ilaasortaasugut tamatta sinnerluta sinniisussaasutit, Asii Chemnitz Narup allappoq.
Demokraatit sinnerlugit oqaaseqartoq Palle Christiansen isornartorsiuivortaaq, inatsit atuuttoq tunuliaqutaralugu siunnersuusiortoqarsimanissaa ujartorlugu:
- Inatsit atuuttoq Jonathan Motzfeldtip ilisimasariaqaraluarpaa, siunnersuusiornermini inatsit allanngortinneqarnikoq tunngavilersuutigisimavaa, Palle Christiansen oqarpoq.
