Inatsisartut siulittaasuat Jonathan Motzfeldt peruluppoq. Siumut sinnerlugu politikeritoqaq 67-inik ukioqarpoq, maannakkullu nakorsat nalunaarput Jonathan Motzfeldt Island-imi napparsimavimmut ingerlatinneqartariaqalersoq.
Toqunartortalimmik nerereernermi kingorna tartuisa sulinerat pitsaavallaarunnaarsimavoq, taamaammallu aavata salinneqarnissaa anguniarlugu Island-imut ingerlanneqartariaqalersimavoq.
Toqunartortaninneq ippassaq ualikkut Qaqortumi pisimavoq. Tassanngaanniit ippassaq Jonathan Motzfeldt Nuummut Dronning Ingrid-ip napparsimavianut ingerlanneqarpoq.
Toqunartortaninneq qanorpiaq pisimanersoq suli iluamik paasineqanngilaq, ilimagineqarporli Jonathan motzfeldt iginertorsimassasoq. Nereqataali allat napparsimalersimanngitsut oqaatigineqarpoq.
Jonathan Motzfeldt politikkikkut suliniartuulluarpoq, 1979-imilu namminersorneruleratta siullersaalluni nunatsinni naalakkersuisut siulittaasuattut inissinnikuulluni. Aamma Jonathan Motzfeldt maannamut sivisunerpaamik inatsisartuni ilaasortaavoq.