Jonathan Motzfeldt aviisimi sammineqaqqilerpoq

Inatsisartunut siulittaasuusimasup, Jonathan Motzfeldtip, kinguaassiuutitigut kanngunartuliorsimasutut pasisaanera maanna sammineqaqqilerpoq, uppernarsaatininngooq nutaanik saqqummersoqarmat. Aviisimi Danmarkimi ullormut saqqummersartumi Politikenimi ullumi taama allaaserisaqarput.
apriilip 12-at 2009 17:56

Politiken naapertorlugu Jonathan Motzfeldt Inerisaavimmilu siulittaasoq, Jens Jakobsen, nassuersimapput, maanna 37-nik ukiulik, Anja Hynne Nielsen, Jonathan Motzfeldtip Nuummi taamanikkut angerlarsimaffiani ukiut marluk matuma siorna arneriffiginiarsimallugu.

Aviisip Politikenip misissuisitsinera malillugu, Jonathan Motzfeldtip Jens Jakobsenillu Anja Hynne Nielsen utoqqatserfigisimavaat, allanullu oqaqqunagu oqarfigisimallugu.

Anja Hynne Nielsen aviisi naapertorlugu immiussisimavoq, Jonathan Motzfeldt tassani oqarsimaneragaalluni, pisimasoq utoqqatsissutigigini, assorsuarlu ajuusaarluni.

Angutit pineqartut taakku marluk taamani unnerluunneqanngillat, politimesterilu Steen Silberg Thomsen oqarpoq, pisoq pissusissamisut suliarineqartoq.

- Uppernarsaatissaqanngilaq, aamma taamani sumilluunniit uppernarsaatissaasinnaasumik nassaartoqanngilaq, politimesteri oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq