Joint Committeep ataatsimiinnera naammassivoq
Joint Committeep pingajussaanik ataatsimiinnera ullumi naggataarnersiorneqarmat peqataasut tamarmik angusaqarluarsimasutut misigisimapput.
Kalaallit, danskit amerikamiullu suleqatigiiffiata, Joint Committeep, pingajussaanik ataatsimiinnera Københavnimi Geologisk Museumimi ingerlanneqartoq, naammassivoq. Aatsitassat pillugit suleqatigiissummut, Memorandum of Understandingimik taaguuserneqartumut tunngatillugu, inersuarmi pisortatigoortumik atsioqatigiittoqarpoq.
Suleqatigiissitat sisamaasut atorfilittaasa nalunaarusiatik atsiortoqanngitsiarnerani saqqummiuppaat. Nunatsinnit aallartitat Joint Committeemi peqataasut angusaqarluarsimatutut misigisimasut Namminersornerullutik Oqartussani pisortaanerup Kaj Kleistip saqqummiussinermi nalunaarutigaa.
- Nunatsinni naalakkersuisunut angusarisimasatta oqaluttuarinissaat qilanaaraakka, aappaagulu naapeqqinnissarput qilanaaralugu, Kaj Kleist oqarpoq.
Aatsitassat pillugit suleqatigiinnissap anguneqarnerata saniatigut taaneqarsinnaapput nunatsinniit Baltimoremut aappaagu timmisartorsinnaalernissaq nunatta USA-llu piviusunngortinniarsarisaat, nunatsinniit umimmaat neqaanik USA-mut eqqussisoqartalissaaq kiisalu nunarsuarmi alumiiniuliorfiit annersaata, Alcoap, nunatsinnut soqutiginninnera misissuiffigineqartussaassalluni.
Joint Committee tulliani ataatsimiilerpat nunatsinni atorfilittat aaqqissuisuussapput, ataatsimiinnerlu Ilulissani ingerlanneqassaaq. Amerikamiut aallartitaata James Cainip tamanna ilorrisimaarutigaa:
- Leif Iluanaarajuup angalaneranut naleqqiullugu ullumikkut ilisimasaqarneruvugut, tamatumunngalu atatillugu Joint Committee qutsavissaraarput. Taanna iluaqutaajuassaaq, James Cain neriorsuivoq.
