Joint Committee Igaliku-mi isumaqatigiissut malillugu USA-p nunattalu akornanni suleqatigiinnerulernissamik sulissuteqartussaq, Washington D.C.-mi aappassaanik ataatsimeeqqammerpoq.
Ataatsimiinnermut atatillugu niueqatigiinnersuaq ingerlanneqarpoq, kalaallit suliffeqarfii amerikami niuernermut paasisaqarluarfigisaannik. Niueqatigiinnersuarmi peqataapput namminersortut pisortallu suliffeqarfiutaanneersut, taakkulu nunatsinni USA-milu siunissami niueqatigiinneq toqqammavilersorniartussaavaat.
Kalaallit angalaqataasut siuttuat, Namminersornerullutik Oqartussani pisortaaneq Kaj Kleist-ip angalaneq iluarisimaarpaa:
-Suleqatigiit akornanni eqeersimaarneq pilersitsiniarnerlu iluarisimaartorujussuuvara. Nunatta USA-llu akornanni suleqatigiinnerunissaq Igalikumi isumaqatigiissutip imarisaa, suleqatigiissutissanik nunat akornanni iluaqutissanik pilersitsivoq, Kaj Kleist oqarpoq.