Joint Comittee ataatsimiilerpoq
Illersornissaq Pillugu Isumaqatigiissutip Igalikumi atsiorneqarnerata kingorna, ataatsimoortumik ataatsimiitsitaliap, Joint Committeep ataatsimiinissaa siulleq, Nuummi Katuami ullumi nalunaaqutaq ataatsimut aallartissaaq.
Ataatsimiinnermi suleqatigiinnissami isumaqatigiissutit aningaasarsiornermi, teknikkikkullu suleqatigiinnerunissamik oqariartuuteqartut oqaluuserineqassapput.
Erniinnannguaq nunat assigiinngitsut pingasut, tassalu Nunatta, USAp Danmarkillu pisortatigut aallartitaasa suleqatigiissitaliaat Katuami ataatsimiillutik aallartissapput, aqagulu nanginneqassalluni. Suleqatigiissitaliap aningaasarsiornikkut teknikkikkullu qanoq suleqatigiittoqarsinnaanera eqqartussavaat.
Soorlu ilisimatusarneq, avatangiisit, ilinniartitaaneq silaannakkullu angallannerup pilersaarusiornera. Nunarput sinnerlugu siuttuussaaq Nam.Oqartussani pisorta Kaj Kleist, USAmit aallartitaq Stuart Bernstein Danmarkimiillu aallartitaq Birger Riis-Jørgensen. Nunatta avammut attaveqarniarnermini periarfissaqalerpoq USAmik suleqateqarnissamut.
Naapeqqaarneq tipisiuninerussaaq, naalakkersuisulli aallaqqaammulli angusaqarsinnaaneq pingaartitaa tassaavoq killeqarfiit akimorlugit ilisimatusarnikkut suleqatigiissinnaaneq. Aningaasarsiornermi teknikkimullu suleqatigiinnissamut isumaqatigiissut aasaq Igalikumi atsioqatigiinneqarpoq. Tulliani ataatsimiinnissaq pissaaq ukiup affaa qaangiuppat.
