Johnson & Johnson akiuussutissalersuinissamut pilersaarummut kinguartitseqqittoq
Septembarip ulluisa aallaqqaataat.
Ulloq taanna nallertinnagu coronamut akiuussutissamik neqeroorfigineqarnerminnik akuersisut tamarmik kapitereersimassapput.
Naalakkersuisut taama paasissutissiipput.
Ulloq taanna qasseeriarluni allanngortinneqareerpoq. Ulloq juunip ulluisa 21-anni Inuiattut ullorsiornermit piffissamut juulimi aggustimiluunniit ... ”ippernarpassuaqalerneranut”, nakorsaanerup, Henrik L. Hansenip marsip ulluisa 31-anni oqaatigaa.
AAMMA ATUARUK Kinguaattoorneq: Inuiattut ullorsiornissatsinnut akiuussuserneqarnissarput angumerisinnaanngilarput
Akiuussutissalersuinermik pilersaarutip naammassinissaata maanna septembarip ulluisa aallaqqaataanik ulloqalerneranut Danmarkip akiuussutissamik Johnson & Johnsonimeersumik atuiniannginneranik pissuteqarpoq.
Danmarkimut 100-gaangata nunatsinnut ataaseq
Akiuussutissap taassuma ilungersunartunik kinguneqartitsisoqarneranut atassuterneqarnera pissutaavoq – taamaamma Peqqinnissamut aqutsisoqarfiup akiuussutissaq taanna danskit akiuussutissalersuinermut pilersaarutaanut ilaatinneqassanngitsoq aalajangerpaa. Taamaammat nunatsinni aamma atorneqassanngilaq.
Nunatsinni: 12,5 procentit siullermeertumik kapitereerput.
7,5 procentit naammassillugu kapiteerput.
80 procentit siullermeertumik suli kapitinneqanngillat.
Danmark: 24 procentit procentit siullermeertumik kapitereerput.
12 procentit naammassillugu kapitereerput.
76 procentit siullermeertumik suli kapitinneqanngillat.
Tamanna pissutigalugu nunatsinni kapuineq septembarip ulluisa aallaqqaataata tungaanut ingerlanneqartussanngorpoq.
Danmarkip akiuussutissanik 100-nik pissarsinerani nunarput ataatsimik pissarsiaqartarpoq - taamaammat akiuussutissanik nunatsinnut tikittoqarnissaanut Danmarkimut tunniussaqartoqarnissaa apeqqutaalluinnarluni.
Danmarkimi akiuussutissamik AstraZenecameersumik kapuineq akiuussutissamik pissarsisimasut ilaanni taqqatigut milittoortoqarnerata kingunerisaanik unitsinneqarallarpoq.
Danmarkimi arnaq 60-inik ukiulik akiuussutissamik AstraZenecameersumik kapitereernermigut taqqatigut milittoorluni toquvoq.
Nunatsinni Astrazenecameersumik Johnson & Johnsonimeersumilluunniit kapitittoqarnikuunngilaq.
Akiuussutissat Modernameersut Pfizerbiontechimeersullu maani nunatsinni atorneqarput.
80 procentit suli kapitinneqanngitsut
Nunatsinni akiuussutissamik siullermeertumik kapitissimasut 8.900-pput, naammassillugulu kapitereersimasut 5.576-iullutik.
Tassa imaappoq innuttaasut 80 procentii suli akiuussutissamik kapineqarsimanngillat.
Taamaammat akiuussutissamik kapitikkusuttut tamarmik septembarip ulluisa aallaqqaataat nallertinnagu neqeroorfigineqareersimassappata sukkasuumik kapuisoqartariaqarpoq.
AAMMA ATUARUK Nunatta septembarimi ammavinnissaa neriuutigigaat – amerlanerujussuilli akiuussuserneqarsimassapput
Tasiilami nunaqarfiinilu maajip ulluisa arfernanit 14-ianut kapuisoqassaaq.
Akiuussutissalersuinerup tulliani nunatta kujataani maajip ulluisa qulingannit 18-ianut kapuisoqassaaq. Tassanilu innuttaasut aappassaaneertumik kapitinnissamik neqeroorfigineqassapput, apriilimilu siullermik kapuisoqarnerani kapitissimanngitsut neqeroorfigineqassallutik.
Akiuussutissamik kapuisut Ittoqqortoormiini, Kangerlussuarmi illoqarfinnilu annerusuni aamma kapuereerput.
