Tuluit EU-mit aninissaannut atatillugu inatsisit akuersissutigineqartussat pillugit piffissaliilluni pilersaarusiornissaq taasissutigineqarpoq. Ministeriunerli tassani ajorsarpoq.Assi: Jessica Taylor/AFP/Ritzau Scanpix

Johnson brexit pillugu taasisoqarnerani ajorsartoq

Tuluit EU-mit aninissaat pillugu pilersaarut inatsisartut marlunngornermi akuersimmata ministeriuneq Boris Johnson qungujulaarsinnaanngorpoq

Akuersisut 329-upput akuersinngitsut 299-iullutik.

Akunnerup affaa ingerlareersorlu pingaarutilimmik allamik aamma taasisoqarpoq. Tuluit EU-mit aninissaannut atatillugu inatsisit akuersissutigineqartussat pillugit piffissaliilluni pilersaarusiornissaq taasissutigineqarpoq.

Ministeriunerli tassani ajorsarpoq. Taasinermimi 308-t kisimik ilaliisut 322-t akuerseqataanngillat.

Tamannalu Johnsonimit tigulluarneqanngilaq. Taasisoqanngitsiarneranimi siorasaarutigaa piffissaliilluni pilersaarusiornissaq akuerineqassanngippat juullertinnagu inatsisartunut qinersisoqassasoq.

AAMMA ATUARUK Brexitimut allannguutissaq akuerineqartoq: Johnson kinguartitseqqinnissamut isumaqatigiissusiortariaqartoq

Johnsonimmi kimigiisissutigaa breximut tunngatillugu inatsisinik suliaqarneq uani sapaatit akunneranni naammassineqassasoq. Taamaalilluni Tuluit Nunaata EU-mit aninissaanut piffissaliussaq tassa oktobarip ulluisa 31-anni eqqorlugu anisoqarniassammat.

Tamannali pisinnaajunnaarpasippoq. Illuatungiliuttummi EU-mit aninissaq pillugu piumasaqaatinik saqqummiussinissaminnut periarfissaqaqqaarusupput.

Brexit pillugu suliaqarneq unikkallartussanngorpoq.

- Inatsisiliorneq unitsikkallassavarput, Johnson oqarpoq.

EU-miillu aninissap kinguartinnissaa pillugu EU-mi siuttut isumasioqqaarumallugit.

AAMMA ATUARUK Johnson taaseqataasussarsiortoq

Tuluit kinguartitsinissaat pillugu EU-p qullersaqarfiata nunat siuttui EU-miittut marlunngornermi unnukkut attaveqarfigigai, AFP-p uppernarsarpaa,

- Taasinermi inernerit tusaatissatut tiguavut, naatsorsuutigaarput Tuluit Nunaanni naalakkersuisut alloriaqqinnissaq pillugu ilisimatitsissasut, EU-Kommissionimi oqaaseqartartoq oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat