John McCain præsidentinngornialerunarpoq
USA-mi naalagaaffeeqqami Arizonami senatori John McCain, aasaq Ilulissaniittoq, USA-mi 2008-mi præsidentinngorniarnissaminut alloriarneq siulleq tiguaa.
Præsidentinngorniunnissamut atugassanik aningaasanik katersiniarpoq, tassungalu atatillugu ataatsimiititaliamik pilersitsiniarluni.
USA-mi inatsisartunut qinersisoqaqqammerneranni, konservativiussusertik iluamik takutinnginnamikku Republikanerit ajorsarput, John McCain oqarpoq.
Irakimi sorsunneq tapersersorpaa, amerlanerusunillu sakkutuuliisoqarnissaa oqaatigalugu, taamaalinikkut USA-p ajugaanissaa qulakkeerneqarsinnaassammat, McCain isumaqarpoq.
George W. Bush-i taarserlugu præsidentinngorniunnissami Republikanerit piukkunnaatillit arlaqarput, John McCainilu taakkununnga ilaavoq.
Piukkussaq alla tassaavoq New Yorkimi borgmesteriunikoq Rudolph Giuliani.