John McCain: Bush soqutigisaqanngippallaaqaaq

Silap pissusaata allanngoriartornerata politikkikkut eqqartorneqarneranut George W. Buship soqutigisaqannginnerujussuanut, Republikanerit tunuliaqutaralugit USA-mi præsidentimut qineqqusaartoq, John McCain, taama isornartorsiuivoq.

Soorlu silaannarmik mingutsitsinnginnissamik nunat tamalaat Kyotomi isumaqatigiissutaat Buship atorunnaarsikkusuppaa.

John McCain aviisimit Politikenimit issuarneqarpoq, oqarneragaalluni, Kyotomi isumaqatigiissummik Buship atorunnaarsitsiniarnera nammineq akuersaarsinnaanngilluinnarini.

Silap pissusaata allanngoriartornera pillugu McCainip politikkikkut anguniarusutani ippassaq saqqummiuppai. Pilersaarutaanut ilaavoq USA-mi C02-mik aniatitsineq ukioq 2050 nallertinnagu 60 procentimik annikillisinneqassasoq.

Bushimullu saammisaarpallaanngilaq:

- Ilumoorussamik unammilligassat ukiut arfineq-pingasut qaangiunneranni ilumoorullugu maannamut iliuuseqarfigineqarsimannginnerat akuersaarsinnaanngilara, McCain ilaatigut oqarpoq. Demokratit isornartorsiuinerat McCainip ilumuunnginnerassaguniuk taama sukangasaarnera pisariaqartoq, USA pillugu ilisimasaqarluartoq, Carl Pedersen, Copenhagen Business Schoolimeersoq, oqarpoq.

- McCainip Bush ingalassimaartariaqarpaa, Bushimi innuttaasut 30 procentiinnaannit maanna tapersersorneqarpoq, silallu pissusaata allanngoriartornera eqqartorneqarpat McCain iluatsitsilluarsinnaavoq, Carl Pedersen oqarpoq.