Eqqaaniut: John Lynge suleqatikkuminartuuvoq

Tusagassiortoq John Lynge sivikitsumik napparsimareerluni 83-inik ukioqarluni toqukkut qimaguppoq. Ilaqutaasut KNR-imut taama nalunaarput.
Allattoq Jens Thorin
aggustip 11-at 2018 12:00

John Lynge, Ujuut, Qaqortumi inunngortoq, tusagassiortutut ilinniarnini 1971-imi naammassivaa, KNR-imilu 1970-ikkut qiteqqusimalerneranniit ukiorpassuarni sulilluni.

Siullermik Radioavisimiilluni, taava aamma KNR-ip Danmarkimi taamani immikkoortortarisaani, Kujataata Radioani kingullertullu Qanoruumi 1990-imi aallartinneraniit 2002-mi soraarninngornissammi tungaanut sulilluni.

- John Lynge tusagassiortutut ilumoortussamik eqqortussamillu ujartuisuuvoq. Aamma kalaallisut paasinnittaaseqarluni tusagassiortarnissaq pingaartitaralugu, suleqatigisimasaa, Stephen Heilmann oqaluttarpoq nangillunilu.

- Ujuut aamma suleqatitut kammalaatikkuminartuuvoq suleqatiminullu quiasaarillaqqittuulluni.