John Lennon ullumi eqqaaniarneqarpoq

Nipilersoqatigiinni tusaamasarsuarni Beatles-ikkunni siornagut erinarsortartuusoq, John Lennon, New Yorkimiilluni angummit silanngajaartumit aallaallugu ukiut 30-t matuma siorna ullumi ulloq inuartarineqarpoq.
Allattoq Najaaraq Egede
decembarip 08-at 2010 11:39

Taalliullaqqinnersuarmigut erinniullaqqinnersuarmigullu tusaamasanngortoq, suli ulloq mannamut eqqaamaneqartuarpoq, taamaammat aamma nunarsuarmi sumiiffinni arlalinni eqqaaniarlugu susassaqartitsisoqarpoq. Aamma inunngorfiani Tuluit Nunaanni Liverpoolimi. Beatlesikkut aamma Liverpoolimeersuupput.

Liverpoolimi nuannarinnittai naasortaliillutillu naneruutinik ikititerissapput, illoqannginnersamilu Chavasse Parkimi, John Lennonimut eqqaassutissap saani aamma erinarsoqatigiittoqassaaq. Eqqaassutissaq Eqqissinermut Pitsaasumillu Inooqatigiinnermut tunngatillugu napparneqarsimavoq.

Lennonip uillarnera japanimiu, Yoko Ono, Lennonip inuartarineqarnerani sanianiittoq, nunamini Tokyomi toquneraniit ukiut 30-t qaangiunnerat eqqaaniarlugu unnugu tusarnaartitsissaaq, Ritzau AFP-lu taama tusagassiipput.