John Kerryp Hiroshimamut tikeraarnini killitsissutigigaa
USA-p nunarsuarmi atombombeq siullerpaaq sorsunnersuup aappaani Hiroshimami qaartimmagu inuit 140.000-it ajunaarput.
Taakkununngalu eqqaassutissiaq ministerip pulaarpaa.
John Kerryllu Japanimi illoqarfimmut pulaarnini attortissutigaa.
- Attorteqaanga, amerikamilu nunanut allanut ministeritut siullersaallunga maaniinnera tulluusimaarutigaara, John Kerry tusagassiortunik katersortitsinermi oqarpoq.
Katersugaasivik atombombimik 1945-imi qaartitsineq pillugu saqqummersitalik, Kerryp aamma pulaarpaa.
- Saqqummersitat alutornarput sakkortullutillu, John Kerry oqarpoq.
- Saqqummersitat puiunngisaannassavakka. Aamma kimilluunniit puiorneqarsinnaasorinngilakka, John Kerry oqarpoq.
Nunat suliffissuaqarfiusut siuttuisa arfineq-marluusut nunanut allanut ministeriinik G7-ip ataatsimeersuartitsineranut atatillugu John Kerry Japanimut tikeraarpoq.
Tassani Syria, peqqarniisaarniat, Kinallu kujasissortaata imartaani pissaaneqarniuunnerit pillugit oqallittoqassaaq.