Johanne Tobiassen siulersuisunngortut peqatigalugit suliassat agguataarlugit suleqatigiilluni suleriaaseqarnissamik sineriammilu peqatigiiffinnut attaveqarnerullualernissamik suliniuteqarniarpoq.Assi: Pavia Tobiassen

Johanne Tobiassen Qaannat Kattuffianni arnani siullersaalluni siulittaasunngorpoq

Qaannat unammersuarnissaat sioqqutilaarlugu Qaannat Kattuffiat ileqquusumik ataatsimeersuarpoq.

Johanne Tobiassen Nuummeersoq Qaannat Kattuffianni siulittaasussarsiornermi marlunngornermi unnukkut qinigaanerpaalluni siulittaasunngorpoq.

Sisamat siulittaasumut qinigassanngortipput Johanne Tobiassenilu Qaannat Kattuffiata ukiuni 36-ni ingerlareernerani arnani siullersaalluni siulittaasunngorpoq.

Qaannat kattuffianni siulersuisunnngortut:

Siulittaasoq: Johanne Tobiassen, Nuuk
Siulittaasup tullia: Ungaaq Tobiassen, Nuuk

Aningaaserisoq: Hanseeraq Kleemann, Nuuk

Allatsi: Abel Jakobsen, Qaqortoq

Siulersuisuni ilaasortaq: Karoline Olsvig, llulissat

Sinniisussat:
Karla Olsen, Sisimiut

Esther Zeeb, Aasiaat

- Siulittaasumut qinigassanngortinngilanga arnaanera pissutigalugu kattuffimmili suliassat pissutigalugit sassarpunga, Johanne Tobiassen ukiorpaalunni Peqatigiffik Qajaq Nuummi suleqataasoq oqarpoq.

Ataatsimeersuarneq marlunngornermi unnukkut Nuummi pivoq qaannat parrunnermi qajaqqinneqqusaannermilu unammersuarnissaat tallimanngornermi aallartittussaq sioqqullugu.

Johanne Tobiassen siulersuisunngortut peqatigalugit suliassat agguataarlugit suleqatigiilluni suleriaaseqarnissamik sineriammilu peqatigiiffinnut attaveqarnerullualernissamik suliniuteqarniarpoq.

Maannalu unammersuarnissat aallartilerneranni taamatut suleriuseqarnissaq misiligarlugu aallartinneqareerpoq.

- Unammersuartitsineq suliarujussuuvoq suliarlu suli oqimaannerulersinnaavoq ataasiinnaavallaartup suliassat naammassiniassappagit, Johanne Tobiassen oqarpoq.

- Taamaattumik suleqatigiilluarnissarput pisariaqartorujussuuvoq suliassallu agguataarluarlugit. Sineriammiit naliliisartut atorneqassapput taakkoqartinnagumi unammersuarnerit ingerlanneqarsinnaanngillat, Johanne Tobiassen oqarpoq.

Maanna siulersuisuni ilaasortat sinniisussallu Qaqortumut, Nuummut, Sisimiunut, Aasiannut Ilulissanullu siammarsimapput.

- Siamasissumik inissisimanerat iluaqutigalugu illoqarfinni assigiinngitsuniit siulersuisut ajornannginnerusumik attavigineqarsinnaapput minnerunngitsumillu siulersuisut immikkoortoqarfiillu suleqatigiinnerat nukittorsarneqarsinnaalluni, Johanne Tobiassen oqarpoq.

Qaannat unammersuarnerat tallimanngornermi aallartikkuni tulliani arfininngorpat naammassissaaq. Unammersuarnernit toqqaannartumik KNR-TV aallakaatitsissaaq.