Johanne ernuttanilu angerlarniarlutik qaammat ataaseq sinnerlugu utaqqisut
Johanne Nielsen Poulsenip ernuttani Atammimmiit Maniitsuliaanniarlugu maanna qaammat ilivitsoq sinnerlugu uttaqqivoq. Kitaata sikua tulaqqammat Diskolinep imaatigut ilaasortaataa Maniitsup Atammiullu akornanni angallasissutaasoq tikinnaveeqqavoq.
- Februaarip arfineq pingajuanni aallartussaagaluaratta sikorsuit aamma mattuteqqagamisigut, taava qaammat sinnerlugu Atammimmiippugut, Johanne Nielsen Poulsen oqarpoq.
Diskoline Atammimmut imaatigut angallasisartuuvoq. Kitaata sikua akunnattoortitsimmat Maniitsumi nunaqarfiinilu piffissami sivitsortumi angallassisinnaanatik, Diskolinep pisortaa Nöel Simoud KNR-imut uppernarsaavoq:
- Sikup pissusaa ullormiit ullormut malinnaaffigiuarparput, ilaasussallu periarfissaqaleriarpat erngerluta apuunniarnissaat sulissutigissavarput.
Qulimiguulimmik attartorniaraluartut
Air Greenland qulimiguulimmik attartorfiginiarlugu attavigisimagitsik Nöel Simoud aamma allappoq.
Atammimmili qulimiguulinnut mittarfeqanngilaq, qulimiguulinnullu miffiusinnaasoq akuerineqaqqaartariaqarpoq.
Kisianni Silaannakkut Angallannermut Aqutsisoqarfiup akuersiniartarnera sivisusinnaammat, Disko Linep taanna periarfissatut isigiunnaarpaa.
Diskoline angallatinik ilaasoqarnissaminnut akuersissutilinnik allanik aamma attartorniarsimagaluarpoq iluatsinngitsumilli.
Johanne Nielsen Poulsenilu suli Atammimmeeqqaarallassaaq.
- Utaqqikannaqaaq, 29-ianigooq angallat Atammimmut misiliiniarpoq, taanna oqarpoq.
Nipaallisaatit nungoqqajaasut
Kitaata sikuata Atammimmut mattussinera Atammimmi peqqissaaviup katsorsaaneranut annertunerusumik sunniuteqanngitsoq Peqqinnissaqarfik Qeqqani nakorsat pisortaat Helle Olsen oqarpoq.
Atammimmi nakorsaatit inuunermut pingaarutillit nungulinngillat, taamaallaalli nipaallisaatit Pilersuisumi nungummata Pilersuisup nipaallisaatinik tikisitseqqinnissaata tunganut Peqqissaavik pisariaqartitsilersunut tunniussisartoq Helle Olsen oqarpoq.