Johan Lund Olsenip utoqqatsernissaa Emilie Olsenip piumasaraa

Inatsisartunut ilaasortap Emilie Olsenip inatsisartut oqaluttarfianiit Inuit Ataqatigiinneersoq Johan Lund Olsen taasissussisimanerminut ullumi pisuutippaa, sakkortuumillu qinnuigalugu utoqqatsissasoq.
Allattoq Mads Lynge
novembarip 24-at 2008 16:55

- Inuit Ataqatigiit sinnerlugit Inatsisartunut ilaasortap Johan Lund Olsenip uannut inatsisartoqatinnullu utoqqatsernissaa piumaffigissavara. Johan Lund Olsenimi uippallersimaqaluni paatsiveerussaallunilu oktobarip ulluisa 15-ianni taasilluta inatsisartuni ilaasortap Kuupik Kleistip toortagaa tooqquaa, ajoraluartumillu eqqarsaqqaarnanga naalaannartoorsimavara. Tamanna inatsisartunut ilaasortat arlallit takusimavaat, Emilie Olsen oqarpoq.

Ataatsimiinnermik aqutsisoq taasereernerup kingorna Emilie Olsenip qiviartinniarlugu ingerlaannaq ussersorfigisimagaluarpaa, kinguneqanngitsumilli.

Taama pisoqareersorlu Emilie Olsen pisimasoq pillugu Inatsisartut siulittaasoqarfiannut allagaqarpoq, qanoq pisoqarsimanera nassuiaateqarfiginiarlugu, kiisalu utoqqatserusulluni.

Inatsisartunut ilaasortap Johan Lund Olsenip iliuuseqarsimanera akuerisinnaanngilluinnarini aamma naqissuserpaa:

- Inatsisartunut ukiorpassuarni ilaasortap, ataqqisama, taama ilaatigut nuanniitsumik uannut kingunerluuteqarsinnaasumillu iliornera akuerisinnaanngilara, Atassut sinnerlugu inatsisartunut ilaasortaq Inatsisartut oqaluttarfiannit ullumi taama oqarpoq.

Johan Lund Olsen Emilie Olsenimut utoqqatserusunnersoq aperaarput, oqaaseqarumanngilarli.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq