Johan Lund Olsenip uranimut apeqqut Nunat Avannaamioqatigiit Siunnersuisoqatigiivisa ataatsimiinnerini qaqippaa
Johan Lund Olsen, Sara Olsvigimut Folketingimi taartaasoq, Nunat Avannaamioqatigiit Siunnersuisoqatigiit Oslomi sapaatit akunnerani uani ataasinngornermit pingasunngornermut peqataavoq. Nunatsinni uranimut akerliunerpaat ilaata tassani periarfissaq iluatsillugu uranimut tunngatillugu nunat avannarliit suleqatigiinnerat apeqquteqarfigaa.
Allattoq Peter Troelsen, Simon Uldum
oktobarip 31-at 2013 12:05
-Periarfissaq iluatsillugu nunani avannarlerni nunanut allanut ministerit apeivakka uranimut tunngatillugu Danmark ikiorusunneraat, Danmarkimmi uranimut tunngasunik suliaqarnissamut ilisimasai paasinnittaasialu annikitsuinnaammat. Norgep nunanut allanut ministeria akivoq, sammisaq eqqumaffigalugu nunanilu avannarlerni ministereqatini tamatuminnga eqqartueqatiginiarlugit, Johan Lund Olsen urani pillugu oqaloqateqarsimanerminut atatillugu taamatut nassuiaavaoq.
Uranillu saniatigut Lund Olsenip aamma aalisarnerup pisassiissutinillu agguataarisarnerp Den Venstresocialistiske Grønne Gruppemi eqqartorneqarnerini peqataavoq. IA-lu ileqquusoq malillugu nunani avannarlerni partiit saamerliunerusut suleqatigai.
