Johan Lund Olsenip Kim Kielsen politiinut unnerluutiginiarpaa
Kim Kielsen Radioavisimut ippassaq oqarpoq, Johan Lund Olsen Inatsisartut ataatsimiittarfianni taasissussisoq nammineq isiminik takusimallugu. Johan Lund Olsenilli tamanna ilumuunnginnerarpaa. – Peqqusersusaanngilanga, Kim Kielsen salluliorpoq, Johan Lund Olsen ualigaa oqarpoq. Taanna ima itisiliivoq:
- Pisoq ajuusaarnartorujussuuvoq. Inatsisartut siulittaasoqarfiat Inatsisartullu siulittaasuat, Ruth Heilmann, pasilliinerit eqqunngitsut, pingaartumik Naalakkersuisunut ilaaortamit, Kim Kielsenimiit, pillugit, novembarilli ulluisa 20-anni nassuiaateqarfigereerpakka. Taamaammat tusagassiutit aqqutigalugit taama sakkortutigisumik unnerluutiginninnera uannut annernartorujussuuvoq, Johan Lund Olsen oqarpoq.
Taamaammat Johan Lund Olsenip Kim Kielsen politiinut ataasinngorpat unnerluutiginialerpaa.
- Eqqunngitsumik nassuiaanera, eqqunngitsumillu unnerluutiginninnera, pillugu unnerluutiginiarpara, pinerluttulerinermimi Kalaallit Nunaanni inatsimmi taama aalajangersagaqarpoq. Tassa kikkulluunniit eqqunngitsumik tunngavissaqanngitsumillu unnerluutiginnittut eqqartussivimmut tunniunneqarsinnaasut, uangalu taamaaliorniarpunga, Johan Lund Olsen qalleqqissaavoq.
Taanna isumaqarpoq Kim Kielsen sallusoq, pasilliinerminilu uppernarsaatissaqanngitsoq. Johan Lund Olsen aamma isumaqarpoq, taasissussinerminik Kim Kielsenip nammineq takunnissimalluni oqarnera uppernarsaatissartaqanngitsoq.
- Kim Kielsen oqarpoq, Kuupik Kleist uanga taasissussimagiga, Kuupik Kleistip Inatsisartut ataatsimiittarfianni issiavia uanga issiavinniit 2-3 meterinik ungasissuseqarpoq. Taasissutisagaaluarukku uanga issiavinniit nerriveeraq qulaallugu pisseqqaartariaqarpunga, taamaasiortoqarsinnaanngilarlu. Aamma talikka ima takitiginngillat attataasaq angusinnaallugu. Taamaaliornissaq ajornarluinnarpoq, Johan Lund Olsen oqarpoq.
Allakkami Inatsisartut siulittaasoqarfianut Johan Lund Olsenip nassiussaani ilaatigut allassimavoq Inatsisartuniit tunuarnissani maanna eqqarsaatigigini.
