Johan Lund Olsen taasissussisarsimasutut pasillerneqarpoq

Inatsisartunut ilaasortaq alla taasinerni peqquserluttuliorsimasutut paasineqarpoq. Paasineqartoq tassaavoq Inuit Ataqatigiit sinnerlugit Inatsisartunut ilaasortaq Johan Lund Olsen. Naalakkersuisunut ilaasortaq Kim Kielsen taama oqarpoq, Johan Lund Olsenip taasissussinera inuit arlaliullutik takusimagitsik.
Allattoq Mads Lynge
novembarip 28-at 2008 14:30

Inatsisartut siulittaasoqarfia taasissussinernut atatillugu sullarloqisoq aamma oqaatigaa. Kim Kielsen ima nangippoq:

- Inatsisartut allat aamma isigivaat Johan Lund Olsen taamaaliortoq. Inuit tamat oqartussaaqataanerannut atatillugu inatsisit allassimasut allassimanngitsullu unioqqutinneqarujussuarput. Innarliingaatsiarput inatsisartut ataqqinassusaannut allanullu, Kim Kielsen oqarpoq, nangipporlu:

- Unnerluussisut kinguneqartitsisuussaapput suliaq tassunga anngutissappat. Ataatsimiittarfimmi pisussaanngilaq, naalakkersuisuni pisussaanngilaq aamma siulittaasoqarfimmi pisussaanani, Naalakkersuisunut ilaasortaq Kim Kielsen, Siumut, oqarpoq.

Peqquserlulluni taasisarsimanerit pillugit siulittaasoqarfiup suliaa Kim Kielsenip aamma isornartoqartippaa, pitsaanerusumik sulisoqarsinnaasimanerarlugu.

Johan Lund Olsenip taamatut pasillerneqarneranut atatillugu inuttaa aperigaluarparput, akerusupporli aatsaat Kim Kielsenip oqaasii tusaqqaarlugit.