Johan Lund Olsen: Nunasinianut inatsit inuppalaarnerussaaq

Taanna isumaqarpoq, nunat allamiunut nunasiniartunut danskit politikkiat "inuppalaanngippallaartoq".

- Ukiuni kingullerni Danmarkimut nunasiniarneq assut sakkortusimavoq, tassami maanna Naalakkersuisuusut annertoorujussuarmik sukatiterisimagamik, Johan Lund Olsen oqarpoq.

Taassuma kissaataa malillugu akisussaaffik Danmarkimiit Nunatsinnut ukiualunnguit qaangiuppata nuunneqassaaq. Akisussaaffimmit tigusinermi Danmarkimi inatsit assiginagu maani qasukkaasoqassaaq. Soorlu 24-nik ukioqalereersimanissamik inatsit peerneqarluni aammalu ilaqutariinnik ataatsimoortitsinermi inatsit qasukkartiterneqassalluni. Tassalu tamakkorpiaapput ukiuni kingullerni Danmarkimi oqallisigineqarnerpaanut ilaasimasut.

- Malittarisassat Danmarkimi ajoraluartumik sakkortuallaarujussuartut maani assiliinnassanngilagut, isumaqarpunga uagut qasuganernik inatsisiliortariaqartugut, tassami pineqarput inoqatigut allatulli ilaqutariinnissaminnik pisinnaatitaaffeqartut, Johan Lund Olsen oqarpoq.

Nunarsuatsinni atugarliorfiusuni inoqatitta pisinnaatitaaffii Johan Lund Olsenip piinnanngilaa, aammattaarli eqqarsaatigai Nunatta atorfissaqarteqisai, tassalu atorfillit immikkut ilisimasallit Nunatsinnut nuunnissamut oqilisaaffigineqarnissaat, aammalu taakku pillugit inatsisinik qasukkartiterinissaq.

- Assersuutigiinnarlugu Peqqinnissaqarfimmi sulisissinnaasaraluagut immikkorluinnaq piginnaasallit, Danmarkimi inatsisit pillugit maanngartissinnaanngisagut eqqarsaatigalugit maani inatsisinik qasukkaasariaqarpugut, Johan Lund Olsen oqarpoq.

Inatsisinik qasukkaanermi Nunatta ineriartornerani suleqataasinnaasut ilaatigut ukuussapput:

- Aatsitassarsiornerup iluani, ineriartorluartumi immikkut ilisimasalinnik atorfissaqartitsivugut, taakkulu pillugit inatsisinik qasukkaanissaq pisariaqarpoq.

Johan Lund Olsen erseqqissaavoq, nunat allamiut Nunatsinnut suliartortut pillugit inatsit atuutereersoq allanngortinneqassanngitsoq, tassalu tamanna ima isumaqarluni, nuna allamiu aatsaat sulilersinnaavoq kalaallimik sulisinnaasumik pissaqanngivissoraanni.